我求大俠搭長程巴士睇「路騷」，成日睇到間財務公司嘅廣告：講個男仔去機場追女友，又鑽戒又機票，結果多得財務公司先追掂！咩害人廣告嚟㗎？唔怪得咁多情殺案啦！
搭雙層巴唔使70蚊
好女仔而又真心鍾意你，就一串魚蛋都搞掂。好似曼城球星羅賓奴咁，雖然周薪有160萬港元，不過同女友肥肥恩（Viviane）喺英國行街，就的士都唔搭，偏偏選擇搭雙層巴士。英國《太陽報》發現後，字裏行間就話羅賓奴孤寒，虧待女友咁話！
呢樣嘢我就撐羅賓奴啦！首先巴西冇公共雙層巴士，佢同女友嚟到貪新鮮，感受一下英國傳統交通工具，又有咩問題呢？係咪逢球星都要好似本土暴發球員咁，開林寶堅尼、蒲夜店、買名牌？呢啲叫樸素品味，英國《太陽報》呢種小報邊識呀！
羅賓奴拖女搭巴士，5哩車程兩張飛加埋約港幣69蚊。不過最重要唔係平，而係可以與眾同樂。一個巴士阿叔就講：「佢哋坐樓下，好似平常百姓咁，大家見到都嚇一跳，捽吓眼先敢圍埋去！」睇吓，搭巴士自己開心，連帶曼徹斯特市民都開心，何樂而不為呢？
搵奶粉錢拒絕情色醜聞
我求大俠之前對羅賓奴印象麻麻，不過睇到佢同肥肥恩生活咁平民化，一啲都冇森巴球星嘅浮誇，加上舊年12月17日做埋老竇，生咗個「細賓仔」，已經再冇傳出情色醜聞。羅賓奴一心搵奶粉錢，難怪呢一年表現咁好，曼城同巴西球迷有福啦！
從羅賓奴一家嘅例子，讀者們亦應該識得搵老婆；肥肥恩雖然外貌平平，不過勝在低調、樸素。所以，唔好相信嗰啲呃人廣告，要鑽戒先肯投懷送抱嘅，就一於由得佢上機，拜拜都可以慳番！