一年一度之「樂聲盃」大賽，上星期日在沙田馬場舉行，今年適逢港澳區樂聲牌總代理信興集團成立五十五周年，信興特別重視樂聲盃，日間舉行賽事，在賽馬會廂房請客，電器界人士冠蓋雲集，日本Panasonic總裁特別來港主持頒獎禮，晚上信興又在洲際酒店舉行大型晚宴，特首曾蔭權親臨酒會向信興創辦人蒙民偉博士見面致賀。
凡有跑馬，左丁山都會到馬場嘅，未去馬場之前（星期六中午），碰到中文大學新鮮人學生Y，考吓佢識唔識答兩個問題。第一條：樂聲牌。學生Y搶答電飯煲；第二條問題，蒙民偉……未講完，學生Y已經搶住話：「蒙民偉樓，我日日都經過。其實唔止中大有蒙民偉樓，我啲同學話，本港每間大學都有一座主要大樓叫做蒙民偉樓！」
咁講法，蒙民偉可能係全港大學生最熟悉人物之一，佢八十二歲咯，稱之為蒙公，以示尊敬，並不為過。星期日去到馬會廂房，只見蒙公精神奕奕，到處與來賓握手。信興請客，有一個特色，就係日本壽司/魚生特佳，個個都知道信興對此有特別高嘅要求，故此自助餐一開始啫，魚生檔大排長龍，評論C喺第一場跑完就去排，至第二場馬跑完先至見佢滿載而歸，數吓時間要成三十分鐘。見到咁嘅賓虛場面，左丁山決定唔去排隊咯，用時間刨馬好過，卒之刨到第五場情況最明朗，可以重槌，十號「財子佳人」與十二號「善風」兩隻有鬥志，有實力，四號「再來旺財」與十四號「羅漢」一領一追，有資格入圍，於是以雙膽拖雙腳再四隻複式，中齊三重彩、單T、四連環、Q與位置Q。開跑前碰到國泰阿倫與太太，佢哋捉住問貼士，左丁山笑曰：「亞倫係財子，太太係佳人，一陣善風將你哋從三藩市送返香港，一於就買『財子佳人』搭『善風』啦！」果然中晒，阿倫太太攬住左丁山錫一啖。吃得有文化之才子S對左丁山講：「你講中一場就當你係神仙㗎嘞，問你走得去邊？」一聽當堂面青，自己邊會場場中咁好彩㗎，為免累人，急急搵個藉口行開先！