阿根廷今晚作客同蘇格蘭打熱身賽，呢場係馬勒當拿（老馬）執教嘅首場比賽。蘇格蘭足總諗住靠老馬同英國人嘅宿怨，票房可以大收，可惜搞到唔旺丁又唔旺財！
英國球迷喺金融海嘯下勒緊褲頭，搞到老馬呢場處子作，當地人都唔肯買飛。截至周一晚，合共賣出27,500張飛，等於球場容量一半，仲差7,500張先維到皮，蘇格蘭足總主席史密夫話：「我知道經濟唔好，不過價格好合理呀！」
畢查一講「上帝」即火
其實今仗成人飛賣18鎊（約209港元），細路飛就10鎊，咁嘅價錢有得睇老馬同阿根廷球星，抵到爛！據講蘇足總畀咗80萬鎊戲金阿根廷足總，可惜遇上金融海嘯令丁財都唔旺。唔通要老馬親自上場表演多次上帝之手，班球迷先肯入場？
講起老馬隻手，蘇格蘭助教畢查就一肚火。原來86年世盃8強1:2負阿根廷賽後，英格蘭國腳畢查同兩名隊友入房做禁藥測試，咁啱老馬一支公嚟到；於是大大隻嘅畢查走埋去，用手勢問對方有冇用手，老馬見對方人多，指指額頭示意用頭頂，逃過一劫。
畢查嘅怒火，提醒我求大俠場波點解冇人睇，皆因後生仔冇目睹上帝之手，對老馬冇「殺父」之仇，美斯又冇到，於是咪唔入場囉！而且，朗尼等英格蘭球員都視老馬為偶像，周一操練老馬跌咗條十字架頸鏈，更有執波仔執番畀佢。既然老馬引唔起轟動同怒火，票房又點會好呢？