生意淡薄，不如賭博，呢個艱難時期，天降橫財更加係及時雨。煲爆馬會，爛賭二零舍多迷信花臣，為贏錢無所不用其極，擇吉時投注、戴水晶金器增財運都嫌未夠喉，仲有好多令人O晒嘴嘅發達秘技，究竟係絕招，定係屎橋？
記者：吳允冲
攝影：周旭文、林栢鈞
模特兒：Eriko（StageModels）
鳴謝：玄學家司徒法正（http://www.kingofmaster.com）
前投注站職員爆料
係人都想煲爆馬會，買六合彩賭波賭馬，個個都想向馬會刮番筆。港人有幾迷信？問我無用，問身邊朋友又做咗都唔認，都係問做過兼職投注站職員嘅小周最實際，佢經常被爛賭阿叔激到生蝦咁跳：「有時真係唔知好嬲定好笑，最煩係啲阿叔，越爛賭越信邪，師奶反而無咁麻煩，後生仔都好迷信㗎，明知用紅筆填飛過唔到機，但都照用，寧願等耐啲，要我哋做Counter嘅用黑色筆幫佢哋重新填過。佢哋唔怕煩，認為咁樣會老利啲，煩只煩到我同埋後面排隊嘅人。」
賭仔信邪九招
1.裝香收買財神
小周：「我見過有人喺門口燒香，燒晒支香先入馬會投注。」唔難理解吖，投注站日日派錢，入面實多財神拱照，係派唔派到你咁解啫。投注前拜一拜，得唔得到財神庇佑？玄學家司徒法正師傅話理論上OK：「最好燒招財沉香或者運財檀香，燒溪錢都可以，因為燒溪錢等於派錢畀鬼神陰差，有錢先使得鬼推磨。」
不過咁，就算保安員唔踩停你，斷估你都唔會當街燒香咁樣衰啩？「所以都係留番喺屋企或者入廟化溪錢好啲，誠心就得㗎嘞。」大街大巷燒香，我就唔敢嘞，反而會考慮效法我個神婆Friend，逢有金多寶就放三支清香入袋先入馬會投注，退而求其次唔知Work唔Work呢？
實用度：★★★★★
2.有借無還攞「筆」走
「好多阿叔特登問投注站職員借筆填飛，」小周：「但奉旨有借無還，實撻埋支筆走，點解？貪諧音似『攞筆（錢）走』囉，每日起碼有兩三個人偷筆，癲到連座連鐵鏈成支筆撬走。」師傅話：「Work㗎，咁做等於向馬會借運，其實唔一定要問投注站職員攞筆，理論上除彩票外攞乜都得。」但撻人支筆，唔啱㗎。
實用度：★★★☆☆
3.着女人底褲擋煞
N年前招數，賭仔話着女人Under入賭場，可以邪一邪個庄，呢招對付馬會又得唔得呢？師傅話：「可以，本身紅色底褲已經有辟邪作用，女人屬陰，着女人底褲可以擋煞同趕走霉氣，令衰嘢埋唔到身，自然提高勝算。」諗真呢招又唔怕用喎，話明Under，笠喺底啫，着咗都無人知啦。
實用度：★★★☆☆
4.紅筆填飛
「用紅筆畫飛部機掃描唔到，啲阿叔硬係話極唔聽，」小周：「要我幫佢用黑色筆再填多次飛，迷信到你唔信。」紅色寓意鴻運當頭，可以旺一旺佢，師傅教路：「其實用朱砂毛筆效果更好，用毛筆寫完字，再用黑色筆冚番啲紅色字咪掃描到囉，係麻煩啲啫。」
實用度：★★☆☆☆
5.利是封裝彩票
將彩票放入利是封，利利是是有益無害，有人屋企供奉財神，索性將利是封置喺神像底，師傅話：「呢招得呀，最好早晚燒三支招財沉香，希望得到神靈眷顧，心誠就有一定效果。」
實用度：★★☆☆☆
6.食「馬」仔
「我見過人專登企喺門口，𡁻完個馬仔先入嚟買馬，」小周：「又唔抹嘴喎，個樣好鬼搞笑。」賭仔貪意頭，最緊要食字，食嘅「馬仔」同跑嘅「馬仔」同音同字，食字取諧音Fit晒，馬迷最Buy，不過今次師傅話：「咁都諗得到？有創意，有無用不得而知，不過我諗起碼可以醫飽肚，食飽先有力刨馬。」
實用度：★☆☆☆☆
7.「中」滿成張飛
「買六合彩嗰陣，唔少人鍾意喺冧巴上面填個『中』字，」小周：「貪吉利囉，只要唔用紅色筆，都唔會阻住我做嘢嘅。」哈哈，咁都諗得到，真係要寫個服字，不過師傅話呢招無料到：「純屬自我安慰，只係將念力加強，贏個氣勢，希望中獎機會大啲。」
實用度：★☆☆☆☆
8.童子手抽冧巴
上一輩啲人會搵小朋友抽六合彩號碼，貪其童子手吉利，師傅：「可以，因為小朋友靈台較清，較易接收好靈感，但咁做會搶走小朋友福份，所以非必要都唔建議用呢個方法，何況仲唔係萬試萬靈？」
實用度：★☆☆☆☆
9.八點殺入馬會
小周：「可能心理作用啦，硬係覺得八點呢個鐘數，投注站最多人。」都係食字求個吉利啫，「八」同「發」音類近，八點投注但求有得「發」，係咁易中就好囉，師傅：「八點唔係對個個人都有利，都要睇番本身命格。」即係嘥氣囉。
實用度：☆☆☆☆☆
師傅教路：咪飲橙汁！
1.七色花浴擋厄運
搞咁多花臣嘢都未必增到財氣，反而簡簡單單浸個七色花沐浴就得，七種靈氣花分別係百合增人緣、蘭花助財運、荷花保健康、玫瑰寓愛情、鬱金香長智慧、水仙求平安、牡丹添富貴，師傅：「冲花凉係種古老道術，人出世似個海綿體，成長期間不斷吸收四周氣場，日積月累會沾染好多唔好氣場，即係交上厄運。冲花凉可以清除厄運，重新換上好氣息，達至轉運添財增人緣效果。」雖然話病態賭徒輸錢賴得就賴，但師傅話：「賭錢真係有禁忌，有啲嘢真係要多加提防。」提防啲乜？自己睇啦。
2.飲「慘」汁
所謂飲橙汁，慘到無錢執，賭仔大忌也，戒！轉飲柑汁就「有金執」，師傅：「信不信由你，攞個意頭啫。」
3.咪剪頭髮
頭髮諧音「發」，有發財之意，剪髮等於剪走發達運氣，所以髮型屋掃地都係由外往內掃，向外掃，等於將財掃出屋外。
4.底褲笠頭=熄火
底褲笠頭一笠衰三年，有根據㗎！師傅：「人有三把火，額頭一把火，膊頭兩把火。底褲笠頭會整熄額頭把火，好運自然減弱。賭仔忌俾人拍膊頭，唔係毫無道理。」
5.人搖福薄
人搖福薄，樹搖葉落，印身印勢無發達，好運會俾你搖走埋，財神見到你都掉頭走啦。
6.遮額頭無火
女仔留長髮，或者男仔鍾意一大執陰遮住額頭，都會影響運程，入得馬會，連戴帽都可免則免啦。
