昨日追訪過中國第一位F3車手Franky程叢夫，他亦不諱言中國人要走入歐洲賽車界有一定困難。講到中國賽車場，除咗珠海之外，更有上海賽車場等，中國賽車事業得以發展，KennethMa絕對係功不可沒嘅一員，就連Franky亦曾參與過Kenneth旗下FRD舉辦嘅培訓班呢！
記者：梁美甜
攝影：譚盈傑
鳴謝：意美汽車
賽車等於放假
Kenneth馬漢華非常熱愛賽車，基於個人愛好，更發展成為賽車學校，讓更多有天份嘅人可以接觸及發揮，培訓新一代賽車手，行內早有賽車大亨之稱。早幾年，Kenneth專注於發展汽車學校，有段時間少咗參加賽事，今年澳門賽車新增GT盃，即時走嚟「放假」，放假去賽車？「我覺得賽車就好似放假咁，比賽緊你會高度集中精神，所有專注力都只係喺賽事上面，唔似得平時放假，想靜都會不由自主諗起工作，就連做緊嘢都會發白日夢唔專一喇！」人人都有自己一套生活守則同態度。
比賽原則
GT盃練習賽首日見到Kenneth，完全睇唔出佢對賽事緊張，「真係唔緊張，我又唔係一定要贏，反而當作運動，同埋自我訓練一下鬥志。」玩咗賽車十二年，亦跑過五、六次東望洋跑道，明言賽道難，每次都會好留神路面作賽，近年轉攻組織賽事及賽車學校嘅佢，更乘機收集數據畀自家車隊咁話：「自己跑就可以知道應付呢條賽道時，部車嘅避震要點調校、輪胎角度、路段情況等等。」想嘅依然唔係比賽勝負，一係好有信心贏，唔係即係預咗陪跑而JustforFun？「要贏好難，因為賽事入面嘅車又唔同型號同級數，唔會針對賽車手為前提下，會先贏車再贏人，喺同Class（級數）入面好有信心贏。」一如Kenneth自己所講，於練習賽上用上同款型號同性能嘅法拉利F360Challenge以佢成績最好，咪住，有部由意籍車手揸嘅F360成績好過佢嘅？「係呀，基本上賽事入面嘅車係要以原裝參賽，就算車款一樣，歐洲行嘅拉利就已經勁過香港，性能有分別，無法！」
正確態度
排位賽當日，Kenneth因對手逼近，就位而揩花右面車身，自問第一眼見到都幾心痛，點知Kenneth反過來安慰：「唔緊要，打完蠟就無事，比賽好平常啫！」呢一刻可以肯定嘅，係Kenneth絕對係為享受而賽車而唔係為勝負而出戰，周日GT盃決賽，Kenneth以第14名衝線，返來依然朝氣勃勃，「經過練習排位賽，知道好多車都快過自己，決賽就先定好戰略，起步已經無諗過亂過車，亦唔好俾其他車過，保持圈速再等機會過車。」預咗賽車危險，自然秒秒講安全，相對而言，平日揸車意外唔知幾時發生，安全措施更不可鬆懈啦！
Kenneth小檔案
Kenneth馬漢華，賽車手，亦係上海及珠海賽車場老闆，先後於雷諾Spider挑戰賽奪取兩個4系的冠軍，05年於全國汽車錦標賽中奪得車手及車隊兩項總冠軍。97年更創辦咗方程式賽車發展公司（FRD），買賽車再請法國教練到珠海開培訓班，成功將賽車學校體制引入中國，FRD更於珠海、上海、北京、成都設有辦事處。