曾經貪得意拜讀於某位名師門下（一堂咁多），筆記入面好刻意放了幾張他用名牌衫鞋袋的炫耀式相片，當年有些衞道之士大罵這是鼓吹物質主義的代表。到JosephLi自立門戶開補習社，拍廣告着晒DiorHomme、Undercover，件件Signature到爆喎，唔怕俾人鬧咩？估唔到Joseph輕描淡寫一句：「你估𠵱家啲𡃁仔𡃁妹儍㗎咩？會為買件衫去做雞？」於是繼續他的品味之談。無錯，小記起碼聽過有人讚Joseph襯衫有Taste，未聽過有人讚小記的「恩師」囉……
記者：梁俊鵬
攝影：楊錦文
環保時裝精？
稱得上是補習天王，Joseph自稱每季都要花十萬置裝，不過始終不同明星無得𢱑Sponsor，點夠着？Joseph就用「Recycle」概念解釋一切：「着得好睇就點襯都得！好似JunyaWatanabe今季的西裝，後面加上格仔布料，就成為新Design。有人話佢上季的格仔衫賣唔晒，用舊料整新衫，我就覺得好睇。」以為他聽到愛牌就會二話不說即買，點知又錯：「買衫為買Details，但都要睇吓個Detail位係咪值錢先？我有件Number(N)ine褸，皮製邊位難度好高，即刻畀錢。有些品牌玩Patchwork或者吊飾都幾無聊，真係寧願自己拎舊嘢DIY，都算係Recycle。」另一RecycleItem是SkinnyPants：「一兩條夠頂一季，我鍾意買Boots、高筒Sneakers，着呢類鞋條褲都被遮了一大截。」講到Recycle正解，Joseph就曾與徐濠縈一起賣二手衫，一放就是三、四十件，又有筆新資金玩過。
身穿破爛、鐵線加工的Cardigan，屬MasakiMatsushima松島正樹作品，是外界將之與三宅一生、川久保玲齊名的後起之秀。
Joseph指住身上的JunyaWatanabe棒球褸話：「人人以為我着恤衫係Mismatch，其實着條好Wea的牛仔褲先叫襯錯！」
其實係慳家王
估唔到，自命其實都幾慳的Joseph，身上無名錶無靚手袋，「錶唔係好見到人，加上我肯定自己會唔見錶，所以唔戴靚錶。最鍾意的袋唔係貴嘢，係一個好似𠵱家𡃁仔鍾意的agn囗sb.大側袋；屋企都有幾個Dior皮袋，不過唔係成日用，少見天日。」
又一個估唔到，拍廣告要見人喎，都可以在此慳番筆：「我拍的廣告成本好平，自己做Stylist，化妝、髮型、攝影加埋一萬蚊都唔使。不過效果咪幾好，記得有次去法國撞到王菲舊時個StylistTiTiKwan，佢問我係咪Wyman幫我搞過形象㖭！」不知是否環保的概念太根深柢固，廣告用咗幾年都未換，畀學生睇吓你個新爆炸頭都好吖！
時尚補習班
網上有人筆錄Joseph金句，竟然唔係話自己又Tip中幾多會考題，而是：「我唔鍾意教新區，嗰度啲人唔識欣賞我啲Fashion。」向Joseph求證，原來真有此事：「好耐之前的事了。嗰時覺得啲𡃁仔乜都唔識，我使乜襯咁靚！但今時唔同往日，好多嚟上我堂的學生哥都好有品味，尤其係港島區學校嗰班，可能我個形象已經幫我間學校挑選咗一批潮人出來。」落堂傾Fashion的學生為數也不少，印象最深就是一位他稱之為「DiorBoy」的學生：「佢哋成班St.Paul仔都着得好潮，經常同我傾時裝，後來這個『DiorBoy』仲去咗英國St.Martins讀FashionDesign，𠵱家得閒仲有聯絡。」
FashionIcon是甘國亮
在八十年代，有多少個今日的中、上流階層不視《號外》為時裝聖經？又有多少人不將甘國亮那種形象與文化俱全的才子拜為偶像？Joseph同樣是由《號外》認識這個時裝世界：「睇靚衫都在那裏，我貪靚，嗰時慢慢開始買靚衫，先係由GayGiano開始。」嘩！現在GayGiano股票已變成一隻礦產炒股，又有幾多個後生仔識Due-G？這件事真的有歷史印記。
越買越豪絕對是每個時裝精的成長階段，九十年代Joseph就轉去Joyce、Swank買Designers'Items：「朋友當然有影響，我身邊都係潮人，啓蒙人應該係黃炳培（又一山人）吧？當年在電影班認識他，就是他帶我去Joyce買第一件CalvinKlein獵裝SafariJacket。還有𠵱家Swank已經無得賣的JohnRocha……」跟手一萬蚊一件Yohji、幾萬蚊一套GuccibyTomFord西裝，就這樣時裝至今。
Joseph's飛佛
a.唯一一件B仔BernhardWillhelm，鍾意靡爛Style的設計令Joseph可以包容他不喜歡的民族圖案。約$6,000/03年出品
b.與D-mop老細相熟，專誠買下這件白色油漆KiminoriMorishitaJacket，最愛其金屬細節位。約$7,000/06年出品
c.黑框眼鏡唔算多，只有20多副，Joseph自豪曾在四季酒店食飯時有外國人埋身問他這副Effector木框眼鏡喺邊度買。約$3,000
d.Undercover成名作樹葉Scarf，Joseph話自己大時大節拍廣告先會出動。約$7,000/04年出品
e.力捧mastermindJAPAN成香港潮牌的，除了Juno還有Joseph。約$6,000
f.作為HediSlimane的死忠粉絲，Joseph99年專誠於法國訂購這件出自Hedi手筆的YSL長皮褸。約$50,000
g.Joseph衣櫃裏最貴的DiorHomme紅色外套。約$40,000
後記
着Dior的惡魔……的跟班？
約Joseph訪問足足用上兩星期，一直未能直接對話，全憑他一位叫阿Tim的助手穿針引線。訪問當日，阿Tim推衣架，抽兩大袋衣服，李生前、李生後地稱呼Joseph。Joseph一句：「喂你落番五樓幫我拎番啲衫上嚟。我六點鐘要走！」阿Tim真係即刻仆到去，還差幾分鐘到六點仲送上幾個溫馨提示。最慘就係Joseph都唔多畀面照窒：「個學生好似阿Tim咁薯！」寄望一朝他可以好似AnneHathaway吐氣揚眉變型啲！
