英國《金融時報》舉辦第三屆歐洲財長選舉噚日揭盅，結果由北歐小國芬蘭財長卡泰寧脫穎而出，打低其他歐洲大國；排第二係德國財長斯坦布呂克。至於有份幫手諗出由政府注資救銀行呢條絕世好橋，令民望低企嘅老頂白高敦贏盡掌聲嘅英國財相戴理德，就因為處理經濟失分太多，喺19個財長中排尾六。
英國輸在經濟差
選舉係根據經濟表現、政治手腕同反映該國應付金融海嘯能力而畀分。芬蘭同德國兩位財爺之所以跑出，主要喺經濟範疇上攞得高分。喺全世界都要咬緊牙關應付經濟衰退嘅時候，搞好經濟梗係最重要，所以排高位都好啱。
戴理德喺政治手腕範疇攞分最高，但英國經濟搖搖欲墜，令佢喺經濟方面失晒分。雖然英國首相白高敦之前推出注資銀行業方案，成為多國救市方案典範，但英國經濟勁差，加上英國被指冇妥善處理陷入財困嘅NorthernRock，就因為咁，令戴理德的排名降到14。
《金融時報》話，正當歐洲多國被信貸危機拖垮之際，芬蘭經濟仍可保持穩定，下年更有機會錄得財政盈餘，財長卡泰寧應記一功，加上佢政治智慧不俗，能夠維持金融市場穩定，所以當選今年最佳歐洲財長。
芬蘭金融穩攞晒分
其實卡泰寧真有先見之明，早喺舊年10月已要求國際貨幣基金組織（IMF）表態，話各國要聯手拯救環球經濟。佢亦無懼強權，早前批評法國總統薩爾科齊只係同幾個歐洲大國商討點救市，明踩人哋搞小圈子。
斯坦布呂克由於管治經濟得宜，亦獲選為今年次佳歐洲財長，但美中不足，係佢政治評分僅排11位。
李華華
mailto:[email protected]