立法會開咗鑼一個月，新丁中似乎以葉劉走勢最凌厲，成日曝光。但大家千祈唔好睇小一批後起之秀，好似公民黨陳淑莊Tanya咁，聽日佢將會喺立法會例會，作出佢當選以嚟嘅處女口頭質詢。作為從政生涯嘅第一次，佢揀咗合和主席胡應湘嚟砌，質問政府點解容許合和佔用公共空間，而且仲紮晒馬準備大戰GordonWu。
大家都知，前稱MegaTower嘅合和二期發展計劃一直係胡應湘嘅baby，由於計劃涉及約有一半屬於政府用地，合和要攞番啲地出嚟同政府換，其中一個選擇係皇后大道東202號QREPlaza嗰幅地，但呢幅成4,877平方呎嘅用地又牽涉公共空間嘅問題。
質疑有人修改城規圖則
Tanya喺質詢前已經做足工夫，佢翻查過好多資料，發現QREPlaza原本只係個公眾收費停車場，城規圖則已經劃定嗰度係公共用地，但𠵱家就變咗做食肆林立嘅商廈，仲特別有條扶手電梯同行人天橋接連合和中心。
據Tanya所知，合和曾經喺99年要求城規會將呢幅地改成商業用途但係失敗，唔知點解2004年經規劃專員稍稍修改申請內容，准許從事指定商業用途後就獲城規會通過，質疑城規會係咪做咗手腳？Tanya仲踢爆正喺度趕緊工嘅皇后大道東214-224號地段、樓高24層嘅GardenEast服務式住宅原先都係公共用地，又係唔知幾時俾城規改變咗土地用途。
睇見咁多係公共空間嘅地方俾哥頓霸晒，Tanya都好勞氣，所以佢話要追問政府點解咁樣審批？合和喺灣仔擴建王國計劃究竟係咪事有蹊蹺？除咗會喺立法會提問，嚟緊佢都會繼續追住呢個問題嚟砌。八方問過合和同發展局，合和唔回應，發展局就以陳議員已經提出質詢為由，留番畀林鄭聽日喺立法會度直接回應。
至於Tanya呢幾個月嘅議會生涯，佢雖然同葉劉為鄰，但最熟絡嘅議會新丁反而係民建聯嘅李慧琼。Tanya接受最新一期中大學生刊物《大學線》訪問時講到，可能係大家年齡相近，但就未至於某啲傳媒講到佢哋係孖公仔咁嚴重。至於葉劉，雖然唔會因為道不同不相為謀而零交流，但講嚟講去都係客套說話。至於最叻搓胸嘅克勤仔，Tanya話暫時接觸機會唔多，未算好熟絡。
mailto:[email protected]