樓價未跌完，股市又大上大落，搞到啲住宅買家心慌慌，買咗樓都寧願撻定走人，累到業主無端端唔見錢。
呢啲情況除咗出現喺中上價樓之外，就連百零萬嘅火炭居屋穗禾苑都不能倖免。
據火炭區代理話，今年4月有個炒家短炒賣出個穗禾苑單位，賺咗廿萬。佢見6月樓價跌，就心雄再入貨，用118萬買入A座高層12室再炒過，點知接貨後樓市一直插水，炒家見無利可圖，10月尾就用101萬蝕本價賣出。
成交冇耐，港股瀉至近一萬點，買家驚到即日唔要萬零蚊定金，撻定走人。業主沒收筆定金後，見個市勢色唔對，被迫再減價放賣，最後喺呢兩日以96萬賣咗畀個用家。業主埋單要輸22萬，連之前賺嗰筆，貼埋都唔夠蝕。
差價追嚟無謂
雖然今次個成交價比之前撻定價平咗5萬，業主有權追差價，但冇理由為嗰幾萬蚊花時間打官司㗎，惟有當自己唔好彩啦！