港交所（388）間唔中會俾人話執法不力，對啲違規上市公司無能為力，但其實佢哋都有苦衷，例如要求公司董事協助調查，有啲離咗職可能會刻意迴避，有時就根本唔知港交所搵緊佢。
網站公告冇得賴
有見及此，港交所噚日推出一項類似尋人啓事嘅新服務──喺自己網站登載「要求協助公告」（RFA公告）。
港交所話藉此向市場人士公告，講明會就公眾已知嘅某事宜，聯絡個別人士。第一批上榜嘅係中國水業（1129）前執行董事陸志成，同中油燃氣（603）3個前董事鈴木雅典、佐藤榮治及金貴男。
水業被指喺06年9月，未能就可能影響公司股價嘅消息，及時及準確地回應上市科查詢；中油燃氣就因為延期公佈05年度全年同06年度中期業績，違反上市規則。