李美鳳移居台灣做少奶奶多年，專心相夫教子。她揚言「做媽媽做得好快樂！」與一對龍鳳胎子女，齊齊打tennis、滑水，收子女的情信，讓她有重活一次的快樂感覺。電眼美人更揚言要等子女長大，才考慮復出，更不介意加入甘草行列，娛樂大家。
曾有電眼美人之稱的李美鳳，96年嫁予台灣富商鄭翔中後，移居台灣做少奶奶，照顧一對龍鳳胎，相夫教子，闊別幕前5年，李美鳳下周來港出席EsteeLauderRe-Nutriv白金人生活動。她早前從台灣來港拍攝宣傳照，接受本報訪問時，笑言要久不久出來嚇嚇大家。
運動訓練意志
李美鳳的幸福少奶奶生活，每天工作便是要教好一對子女，閒時做運動喼弗，她說：「隔日游水、跳舞，因為想令個人有彈性啲，心情好啲，仲學緊tennis，又同小朋友踩吓單車咁。」她鼓勵自己跟子女一同做運動，除了鍛煉好體魄，還要鍛煉的是個人意志，她說：「有次一家人去海南島玩咗十幾日，去咗滑水，好開心，老公都有同我打tennis同游水，但佢就冇我玩得咁多。
「其實運動係我帶起先，我同仔女打tennis可以由5點鐘打到9點。我好鼓勵仔女多做運動，因為做運動嘅人唔只身體好，仲會令人思想正確，好似佢哋參加游泳隊，除咗可以鍛煉毅力，比賽時要贏都要識輸，學會不屈不撓精神同做人道理，先最緊要。」
丈夫引以為傲
跟丈夫結婚12年，李美鳳管理一家頭頭是道，她揚言丈夫為她覺得驕傲，子女則令她有重生的感覺，她說：「𠵱家好似十幾歲嘅青少年，好似個學生咁，呢對仔女令我重新再活一次，做媽媽做得好快樂。佢哋好黐纏，我每日6點半就要醒，因為佢哋要錫我攬我一輪先出門口，佢哋有時仲會寫e-mail畀我講啲情情塔塔嘅說話，例如我好愛你呀，肯定多過我先生。」
自嘲非女主角
對於最近影圈頻頻有人復出如林青霞、蕭芳芳等，未知李美鳳可會是下一個？她說：「我𠵱家啲小朋友太細，得10歲，我唔會錯過佢哋嘅成長，呢樣嘢係唔會返轉頭，如果我要做甘草演員，𠵱家做又得、5年後做又得，60歲做都得，我擺明唔會做女主角㗎啦。」
李美鳳續說：「復出起碼要5年或8年之後，佢哋大咗，我先會考慮。」不過她揚言已經開始計劃退休生活，她說：「我想學好多嘢，好似學國畫，又或者學彈鋼琴，然後到老人院娛樂啲公公婆婆。」
45歲緊張護膚
雖然已近45歲，但李美鳳由心發出來的氣質及女人味，有增無減。她最近獲化妝品牌EsteeLauder邀請，與吳小莉、賭王孫女何家華、張天愛等成為EsteeLauderRe-Nutriv白金人生的時代女性，對護膚甚有研究的她說：「𠵱家會緊張自己皮膚，因為已經踏入45歲，好老，要keep好啲皮膚。」
一日潔膚三次
李美鳳又說：「因為自己皮膚好亁，尤其眼部護理，eyemask好重要，如果多紋會老好多，不過用完mask，然後冲凉浸熱水，用手按摩臉部時，全身都要放鬆，等臉部好好吸收同休息，之後感覺都會好啲，而一般清潔，我一日會做三次。」
採訪：LawWaiMan
攝影：ChenWaiOn
化妝：RickChin
髮型：RayChan
服裝提供：BV、YSL
場地提供：EsteeLauder（圓方）