港、九兩間華仁書院專出政商名人好多人都知，但原來佢哋嘅幕後主事人喺回歸前曾經一度諗過放棄辦學，好彩最後關頭佢哋決定留低，同香港人共渡甘苦、跨過九七，今時今日莘莘學子，同慕名而至嘅家長，先有機會繼續報讀呢兩間名校。呢啲秘聞八方點解會知？皆因有本800幾頁嘅歷史書囉！
擔心回歸想撤出香港
華仁係天主教學校，來自愛爾蘭嘅耶穌會會士好多年前接咗嚟做，教學生用知識幫助窮人，辦得有聲有色，八方噚日去咗耶穌會神父來華八十年事跡書介會，就撞到馬丁李柱銘、梁家傑兩位政界校友，又見到唔少投身教育界嘅華仁仔。本歷史書《JESUITSinHONGKONG,SOUTHCHINAandBeyond》有800幾頁，厚過《黃頁》重過磚，八方一睇，竟然發現一段鮮為人知秘聞。
原來八九年六四事件後，耶穌會諗過應唔應該繼續留低，當時香港人心恐共，擔心香港赤化後冇好日子過，神父憂慮都唔係冇道理，佢哋唔單止想唔搞靜修院同港大嘅宿舍利瑪竇堂，最得人驚係一度考慮唔辦學，停辦兩間華仁書院！
八方睇完驚魂未定，即刻問馬丁知唔知呢件事，佢聽到都嚇一跳，「唔係啩，完全未聽過！」其他校友亦好愕然，似乎對呢件事都聞所未聞，正當大家狐疑之際，兩間華仁嘅校監周守仁神父出現，證實咗呢個講法。
FatherChow話，當年佢哋20、30個會士開咗個大會，傾耶穌會士應唔應該撤出香港，愛爾蘭會士人數稍多，絕大部份人都覺得要留低，但有受過中共苦頭嘅會士就好擔心，驚97後會畀人拉去坐監，又怕失去宗教自由，最後由省會長吳智勳神父發出聲明，表明耶穌會留守香港同澳門服務，兩間華仁先有得留低。
當年聲明話耶穌會留守港澳，係因為要繼續幫助窮人，因為窮人冇得揀，會士要同佢哋共進退。呢本記載耶穌會喺香港80年歷史嘅書由愛爾蘭神父莫禮善寫，入面仲有200幾張珍貴嘅歷史圖片，想知多啲秘聞，可以去兩間華仁買，每本只係300蚊。
mailto:[email protected]