畢傑兄喺早飛版連中兩口，搞到今日由小弟牽牛推介，都有唔少壓力；加上周中國際友誼賽戰意難測，都喺小注出擊。
歐洲主要聯賽開始踏入季中，加上歐聯、歐協等盃賽冇停過，大名氣嘅國家隊對今次周中嘅國際賽期視為雞肋，衞冕世界盃嘅意大利就係好例子，我就唔信佢哋周中作客贏到希臘，希臘受讓平/半，有贏無輸。
意軍友賽唔認真
意大利無疑由納比接手，戰績好番好多，世界盃外圍賽4戰3勝1和，不過有跟開意大利嘅球迷，都知佢哋對友賽唔認真，8月對奧地利嘅友賽，千辛萬苦先迫和2:2，睇番意大利19人大軍陣容亦都唔對辦，雖然都有東尼、簡拿華路、基奧斯比羅斯等外流兵，但門神保方未復出，今次兩個門將都嚇親人，一個係錫耶納嘅古斯，一個係加拉塔沙雷嘅廸辛廸斯，級數肯定唔夠；而且呢排「弗」到震嘅前鋒廸比亞路又落選，中場冇派路，攻力大打折扣。
希臘由列哈格執教，外圍賽4戰3勝1負；雖然比較熟識嘅前鋒、好似紐倫堡嘅查理斯廸斯同些路廸嘅森馬拉斯未有入選，不過都有一對效力德甲嘅尼高里貝路普路斯及基卡斯在陣；主場出擊一啲都唔輸蝕。
過關配腳方面，先取卡塔爾主場對日本開「細」；呢場世界盃亞洲區外圍賽可謂生死大戰，兩隊同得4分，贏波一方出線機會甚濃，緊張氣氛之下，開「細」機會高；而烏克蘭主場對挪威，考慮挪威甚多本土球員，而挪超聯亦收「咧」，球員抱放假心情，主場的烏克蘭有力贏波。文：牽牛
〈早飛倉〉
主菜：星期三16希臘（下）@800
渾水摸魚過關：星期三3卡塔爾細（1.68）x星期三8烏克蘭勝（2.05）x星期三16希臘（下）3x1@200
今日早餐價錢：-$1,000
上日賺蝕：+$1,160
早飛倉結餘：$96,134
規則：$100,000本錢，每日買早餐最多動用$5,000，最少$1,000，逢周二、五起身食早餐（見報）。
難啃早餐
星期三19 荷蘭勝（1.5）
荷蘭又係另一支友賽輸怕人球隊，瑞典作風一向硬朗及鬥志高，伊沙克臣改投燕豪芬，亦對一眾本土荷蘭兵熟路。
周中早飛超級重心
星期三15 土耳其勝（2.2）
奧地利主辦完歐國盃後，國家隊水準打回原形，相反土耳其有眾多新星上位，作客贏波有何難。
星期三21 愛爾蘭細（1.65）
個人對查柏東尼呢位教練冇咩好感，愛爾蘭亦一向守強攻弱，波蘭作客亦唔算多波入，入球細好路。
星期三24 西班牙勝[-1]（1.75）
西班牙捧完歐國盃有如脫胎換骨，近期遇神殺神，智利處於重建期，作客亦差，料大敗。