裁員之聲不絕，令人擔心，淨係上星期五睇新聞，已知星展裁四至六百人，花旗再裁一、二百人，摩根史丹利傳聞要裁一百人，亞視裁四十七人，澳門金沙擴展工程停工，香港工人有四千被炒：加加埋埋，高薪嘅、低薪嘅、中層嘅，無一倖免，令人擔心新年後更多人被炒，市面更加不景。
中午飲茶時，金融C話到目前為止，仲未收到任何聖誕派對嘅邀請函，而佢哋公司就遵照大老闆命令，一切從簡，乜嘢公司聖誕晚會、新年慶祝都唔搞，各部門可以自己分別搞，但唔准請外邊客人，要一切從簡。金融C有一個大客以往年年都在會展請春茗，起碼一百圍枱以上，佢聽到話已經取消。咦，第二次聽到類似消息咯喎，上個星期先至聽到船務C講話明年農曆年後唔再請春茗，慳得就慳。美國嘅摩根史丹利嘅紐約總部已經發通告，今年唔搞聖誕派對㗎嘞，呢股潮流乜咁快傳到嚟香港？
餐飲M話冇大型派對唔緊要，酒店受損啫，會有好多部門小派對代之而興，呢類AA制小派對多數在蘇豪、蘭桂坊、太古廣場、IFC啲餐廳酒吧舉行，餐飲M話佢間小店喺十月份錄得最佳銷售紀錄，皆因佢啲顧客以散戶及中小餐廳為主，大家慳啲使，唔上大館子、豪華館子之時，多在屋企食番餐，佢啲歐洲中價餐酒與橄欖食油就零舍好賣。
餐飲M話：「如果你仲有心情送子女入英基（ESF）學校，機會到嘞，我聽到一間英基學校一個月之間流失咗近五十位學生，空缺大增。原因好簡單啫，外籍學童嘅父母被外資機構裁走或者奉調回國，啲學童咪要退學囉。」最弊就係，外籍人士冇嘢做之時，本地高級中產嘅職位亦可能同時岌岌可危呢！
飲茶聽到咁多壞消息，嘆息而去，落到大馬路，碰到退休長者大師兄Y，畀佢捉住訴苦，原來佢中咗招，你明㗎啦，雷曼債券呀，係正宗雷曼債券，不是迷債，不是ELN，而係最簡單嗰種債券，入場費十萬美元，雷曼破咗產，咁就玩完！美國佛羅里達有一位七十餘歲醫生買入雷曼百分之一百保本票據，損失二百五十萬美元，唯有搵律師控告銀行，聲稱受到誤導，德國亦有相類似例子，一家雷曼破產，苦主到處都是。