我求大俠細細個已經留意開《奇聞》呢本雜誌，行過街邊書報攤總會望多兩眼，睇吓會有咩奇趣新聞。巴甲第35周發生嘅怪事，我直頭覺得《奇聞》嘅老總，可以將呢單嘢用作頭條封面用；事關呢周巴甲10支主隊全勝，開足10個主W！
巴甲呢個聯賽，一向主隊勝率特別高，我求大俠成日都聽到畢傑同蘋果波神談論呢個重點。估唔到嘅係，第35周嘅巴甲，竟然開足10場主W啫，呢個絕對係一個奇景！由上周三嘅明尼路計起，加上周六3場，再加周日6場巴甲賽事，10支主隊開W開到開巷，最衰馬會冇10串1兼冇得串隔幾日波，如果唔係10蚊都派$2,360。
聖保羅甘美奧鍊入直路
睇番呢10隊主隊，贏波可謂各有所需，最受注目當然係聖保羅贏費古倫斯3:1，同埋甘美奧贏哥列廸巴2:1呢兩場波。事關巴甲只淨番3周賽事進行，聖保羅（68分）同甘美奧（66分）𠵱家基本上成爭標雙頭馬車，因今周「客隊」高士路（61分）、彭美拉斯（61分）破唔到魔咒輸波，經已俾上述兩隊放甩。
至於周日法林明高大勝彭美拉斯5:2後，都只係得63分，要後上封王有啲難度。究竟係卡卡嘅母會聖保羅，可以歷史性地取得聯賽3連霸；定係朗拿甸奴母會甘美奧後上搞掂？仲有3周就知答案。喺度提提大家，聖保羅嚟緊兩場要對華斯高及富明尼斯兩間護級球會，反而甘美奧只對榜尾伊帕汀加、可踢風流波嘅維多利亞及明尼路，相對賽程較輕鬆，波友投注前要留意喇。
護級組同樣鬥得激烈
有「冠軍組」，自然有「護級組」，第35周開主W嘅山度士、富明尼斯、帕拉尼恩斯、紐廸高同伊帕汀加都攞到救命3分，「降班區域戰」同樣鬥得精采㗎！