幾個月前，新城市廣場和沙田大會堂之間的花園大修，聽聞是為奧運做一些改善工程，7月尾落成，是為「城市藝坊」，原來這個設施，除了為迎奧運而設之外，唔覺唔覺，竟是一項億萬公共藝術工程，是個開放給公眾的美術館，陣容勁過六本木山，最近更奪得國際公認的建築獎，真係「估佢唔到」。
記者：張一豪
攝影：陳陶鈞、張一豪、部份照片由被訪者提供
公共藝術要入世
沙田的「城市藝坊」，落成不到半年就報捷，最近得到杜拜的「CityscapeArchitecturalAwards」，身為藝術總監的香港中文大學藝術系副教授陳育強亦始料不及，「當初新鴻基地產慈善基金想搞一個放在公共空間嘅永久性計劃，去年7月開始構思，本身要顧及好多方面嘅程序，但因為以北京奧運為主題，出師有名，好多程序政府都開綠燈，進展特別順利，一年左右便完成。其實做一個咁嘅project，發展商梗係想佢有國際性、前瞻性，政府日後又會擔心管理問題，當中又要聯繫藝術家，做兩三年都唔出奇，但今次前期評選同協商，直到批出工程動工，花唔夠4個月，落實去做至完成都係8個月，成績同效率都非常好。」
「選出的19件作品，都係出自國際重要著名藝術家，最特別係好多未必係雕塑家，當中有時裝有建築，有咁多陣容之餘，又有咁多特別作品，係公共藝術嘅一大突破。雖然唔係刻意同東京六本木山做比較，但原來完成品風格好接近，令我哋更加自豪，做得唔會比人差。」就算無獎，陳育強對今次的成果都十分滿意。「最初搵咗約500個藝術家，以京奧為題，最後肯參與嘅構思都好特別，除馬之外，亦有圍繞沙田特色做主題。好似徐冰《馬照跑》以馬匹名字，轉為英文拼音與中國書法方式結合嘅密碼，意念好突出；又有國際名建築師Hadid嘅玻璃纖維物料運用，都可以提高香港雕塑嘅水平。我認為公共藝術係要入世，呢度一系列嘅展品融入公共環境入面，唔係一種強制嘅文化藝術教育，而係一種潛移默化，可提高一個地方嘅文化水平。呢度嘅做法好多都好新，不論係藝術品管理，同埋公共藝術方向，都可為將來西九做參考。」
一億藝術伸手可及
今次「城市藝坊」的設計，是香港著名建築師兼室內設計師何周禮BarrieHo負責，上月得到杜拜的「CityscapeArchitecturalAwards」，在電話訪問中，一提起這個獎，他還未平息興奮的心情，「杜拜搞呢個Cityscape建築展覽同會議，係世界所有最大發展商晒冷嘅地方，近5年國際地位好高，我唔敢講係世界最top，但肯定係全中東及至亞洲最矚目嘅會議，個獎係由theRoyalInstituteofBritishArchitects（RIBA）、theAmericanInstituteofArchitects同埋ArchitecturalAssociationoftheUAE等支持，要符合對商業、公共、文化、居住及旅遊等五項貢獻，先至有機會入圍，最初得到通知，話入選咗叫我哋去觀禮，當時都患得患失，唔知去唔去好，因為去到杜拜又唔一定得獎，加上參加一次成本好高，點知建築商都鼓勵我去，最後公佈我哋得到獎，係我今年拎11個獎之中最開心嘅一個。」
聽Barrie轉述當日大會頒獎嘅評價，「在一個舊有的消閒建築上，加入很多新元素，成為一個24小時的全天候美術館，而且得到如此大量的藝術名家支持，實在難能可貴，對奧運、社區環境、藝術各方面都有傑出貢獻。」除以前建大廈外，Barrie從未做過近億的戶外工程，今次憑這個公共藝術的建設而得獎，覺得十分喜出望外，「呢個project可以將藝術融入生活，更加可以喺公眾展示咁傑出嘅作品，最重要唔係做到好高高在上，配合園林設計，有刻意突出嘅作品，亦有比較隱蔽要人去搵，又有休閒作用，整個設計都好有趣味。」
大家日日望中六合彩，不望頭獎中二獎都滿足，沙田原來在一個公眾地方放了一億，而且伸手可及，以後經過沙田新城市，或者去大會堂，不妨駐足吸一吸地氣，不論是藝術氣息或是財氣，難得香港有個這樣有趣的地方，不要浪費！
街訪有say
Kim：「有留意，鍾意白色（Hadid）嗰件，坐到好多人，反而紅色嗰件坐得太少人，有啲浪費。」
Cherry：「我知道為奧運馬術而整，好似太刻意，如果可以無咁大限制仲好，同埋多啲對外宣傳好啲。」
錢先生：「成個環境都變得好舒服relax，環境亦都好咗，不過未有試過刻意睇呢啲雕塑。」
小工程大意義
香港雕塑家戴尚誠是《香港都市雕塑導引》的作者之一，據他統計，截至08年9月，香港已知的都市雕塑有440件，人均都市雕塑數目每16,000人1件，遠低於英國4,000人及北京7,500人一件，但已發展土地雕塑比率每0.62平方公里1件，比英國1.5平方公里1件及北京市1.7平方公里1件為高，其實公共藝術無處不在。
陳育強教授說，公共藝術的角色應該入世，關心社會，而且可以為人群發聲更好，將一般人看不到的事，或者以其獨特的眼光，表現出來。今年最新「落成」（還未完全完成）的其中一個都市雕塑群，就座落於天水圍，據有份參與的戴尚誠說，今年年中動工完成大部份，因為是私人出資，資金不夠還有一部份腳座未能完成，放在天水圍公園噴水池一旁，等待融資「救腳」，與「城市藝坊」同「雕」唔同命，難道這也是香港貧富懸殊的活生生寫照？
街坊幾句
楊小朋友：「放喺度幾好，幾得意，我只知係一啲圖騰，唔知有咩意思，最好有少少簡介。」
周小姐：「都有留意，不過唔知係乜，最好多啲資料，等我哋可以睇得明啲。」
