女仔蒲MK真係慘，人有三急搵唔到廁所都咪話唔痛苦，心慌意亂盲摸摸，越心急就越搵唔到地方解決。唔使驚，淡定有錢剩，今日教你MK女廁攻略，由港鐵銀行中心出口做起點，兜個圈幫大家尋廁，女生們，呢張報紙，Keep起佢啦。
記者：周靜雯
協力：許維雅
攝影：伍慶泉
尋廁之旅
旺角人多車多連廁所都多，唔信？由銀行中心出發，沿西洋菜南街往家樂坊方向行，兜兜轉轉已經有7個廁所，仲未計沿途啲乜乜物物購物中心裏面嘅商戶專用洗手間。啱，多，未必好，所以我捱義氣，無懼臭氣唔怕排隊，來一趟MK尋廁之旅，兼以亁淨程度、有無梘液、要排幾耐隊等各方面評分……吓？咁快？急嗱？OK，出發！
1.最就腳：亁淨必去！
地址：彌敦道636號銀行中心廣場
斷估你曉去銀行中心報名旅行，但未必會知隔籬有幢BCMall。BCMall前身係永隆銀行，2006年改建成購物中心，作為Shoppingmall，個廁所果然見得吓。商場門口同港鐵站出口唔夠十步距離，非常就腳，雖然只得一個廁紙座，但阿姐好快補充廁紙，加上每日清潔3次，尚算亁淨。
亁淨度：★★★★★
廁格數量：4格，頗寬敞，企到兩個人
自動水龍頭：有
梘液：有
紙巾：1個紙巾座，放於廁格外唔太方便，紙巾尚算柔滑，韌度不俗
抹手紙：無
亁手機：無
人流：每分鐘5人，要等位。
點去：入商場搭扶手電梯上2樓，轉左見貼紙相舖，往左直行即見，等1分鐘
2.上下兩層：要識揀！
地址：西洋菜南街51號友誠商業中心地庫
友誠商業中心地庫美心嗰層個女廁，整體設施同亁淨程度都唔錯，燈光橙橙黃黃，真係解決都解決得有Mood啲。相反同一幢大廈大家樂嗰層，廁所勁污糟，仲要齋有女廁無男廁，都咪話唔驚！女生們識揀啦。
亁淨度：★★★
廁格數量：2格
自動水龍頭：無
梘液：有
紙巾：有，手感幾好，但唔及BCMall咁柔軟，較薄，韌度高
抹手紙：有
亁手機：有
人流：每分鐘2人，要排隊，等2分鐘
點去：搭扶手電梯到地庫美心，然後左轉
3.最佳進步獎：有鎖等於無鎖！
地址：彌敦道612-618號好望角大廈地庫B1號店
記憶所及，西洋菜南街麥當勞個廁所認真麻麻，估唔到𠵱家令人刮目相看，一日洗足4次廁所、地板亁爽、無濃烈廁所味，比以前亁淨好多。話就話有鎖要等人開門，不過人流實在太旺，分分鐘都有人出出入入，絕對借得過。
亁淨度：★★★囗
廁格數量：4格
自動水龍頭：無
梘液：有
紙巾：無
抹手紙：無
亁手機：有，但試咗好耐都無風出
人流：每分鐘3人，要排隊，等1分鐘
點去：落樓梯到麥當勞，再轉左
4.長命樓梯：撐到氣喘！
地址：西洋菜南街6-12A號地庫KPC
西洋菜南街KFC，一推門，先俾條超高超直樓梯嚇親，我撐到上去都喘晒氣，何況老人家？長者有需要，呢個廁所唔太適合嘞。廁所面積唔大，見到樓梯污污糟糟，心諗裏面唔慌亁淨得去邊啦，點知估錯，地方亁淨設施唔差，認真估佢唔到。
亁淨度：★★★
廁格數量：2格
自動水龍頭：無
梘液：有泡泡梘液
紙巾：有，韌度夠，不過都幾粗糙，嚡手㗎！
抹手紙：無
亁手機：有
人流：每分鐘3人，要排隊，等2分鐘
點去：KFC內上一條樓梯
5.最隱蔽：唔使排隊
地址：西洋菜南街1號兆萬中心
可能兆萬中心個廁所實在太隱蔽，要搭扶手電梯上7樓，左轉右拐先搵到，所以人流唔多，一定可以安安樂樂咁解決。下午三點呢類非繁忙時間，拎份報紙入去慢慢嘆都仲得，環境清潔留耐啲都無問題，不過如果真係超急就唔好考慮囉，怕你上得去都已經……噢！
亁淨度：★★★★
廁格數量：5格，唔好俾右邊道門呃倒，擺雜物㗎咋。
自動水龍頭：無
梘液：無
紙巾：無
抹手紙：無
亁手機：無
人流：每分鐘唔夠1人，唔使排隊
點去：搭扶手電梯上7樓，往右行，全程8分鐘
6.快靚正：廁格多但細！
地址：登打士街56號家樂坊
家樂坊廁所又係要等人開門嗰隻，好彩商場人流旺，道門根本無機會閂埋，門鎖形同虛設。咁多人用一定好污糟？No喎，阿姐長期打理廁所，唔會太烏煙瘴氣，有10格廁格設施齊備，要鬧就係廁格太細，個袋大啲都閂唔到門。
亁淨度：★★★囗
廁格數量：10格，5格畀客用，其餘有租戶專用，但啱啱有人出入都可以用
自動水龍頭：有
梘液：有
紙巾：有，柔軟超薄，無分格虛線，撕得唔方便
抹手紙：有
亁手機：有
人流：每分鐘3至4人，等2分鐘
點去：商場門口往左直行，再轉左
7.踎廁：唔啱老人家！
地址：花園街3-5號鴻威大廈1樓A舖
花園街大快活女廁感覺好現代化，設施好齊好新，但怪在居然用踎廁！論衞生程度，我覺得OK，但阿姐一定要好勤力清潔，因為每個人準確度有差異，難免會整濕地方。另外，老人家用踎廁比較困難，踎完企番起身，分分鐘見暈呀。
亁淨度：★★囗
廁格數量：2格，寬落，膝頭哥唔會撞牆
自動水龍頭：有
梘液：有，泡泡梘液
紙巾：有，表面凹凸，柔軟程度比KFC好得多
抹手紙：有
亁手機：有，不過無風出
人流：每分鐘1人，排隊機會不多
點去：入大快活直行再轉右
8.最驚嚇：頂唔順先去！
地址：洗衣街花園公廁
洗衣街花園公廁有好濃烈廁所味，廁格好濕地下好多廁紙，原來撞啱嗰日無廁所水，用水冲廁難怪成地水，好彩有阿姐不停清潔，否則情況可能更差。
亁淨度：囗
廁格數量：12格（3格坐廁，其餘踎廁）
自動水龍頭：無
梘液：有
紙巾：廁格外有紙巾供應，嚡就嚡啲，但尚可接受
抹手紙：無
亁手機：有
人流：每分鐘6至7人，排隊1分鐘
點去：花園街19號花園廣場對面
9.估佢唔到：紙巾最靚！
地址：洗衣街59號麥花臣遊樂場公廁
又係踎廁，仲要係公廁㖭，麥花臣遊樂場女廁衞生程度一般，不過提供嘅紙巾，竟然係咁多廁所中品質最好，人流唔算多，唔使點排隊，衰就衰在係踎廁，除咗唔適合老人家，肚痛起上嚟要你踎都咪話唔腳軟。
亁淨度：★囗
廁格數量：4格，全為踎廁
自動水龍頭：無
梘液：有
紙巾：廁格外有紙巾供應，柔軟嫩滑韌度夠，亦唔會太薄
抹手紙：無
亁手機：有
人流：每分鐘2個人，唔多使排隊
點去：遊樂場有指示牌指路
搭住港鐵都得
搭搭吓港鐵嚟料？唔使驚，因為港鐵會借出員工廁所畀有需要乘客使用。以旺角站為例，廁所設於A出口附近，用「專用出閘票」出閘，港鐵職員便會帶你去方便，搞掂晒再返客務中心，職員會開番閘等你上月台，唔會扣多程車錢㗎。不過，呢個服務只會提供畀有需要乘客，咪濫用呀。
