轆Book：<br>澳門貼身追蹤　中國首位F3小車神

轆Book：
澳門貼身追蹤　中國首位F3小車神

作為澳門一年一度盛事，名門世家第55屆格蘭披治大賽車於剛過去周日圓滿落幕，當中矚目賽事絕對係三級方程式賽事及FIAWTCC世界房車賽澳門東望洋大賽喇，當中作為首位中國F3車手嘅程叢夫Franky，以Volkswagen車隊車手踏足澳門F3賽場，出戰東望洋。

記者：梁美甜
攝影：譚盈傑
鳴謝：意美汽車、VolkswagenHK

Franky10歲開始玩高卡車，初時只為興趣，但玩落發現有天份，結果16歲就登上國際舞台，走出中國，今年更成為Volkswagen旗下F3車隊車手，發展成個人事業。澳門格蘭披治大賽由11月13日至16日期間舉行，首兩日係各項賽事練習賽，排位賽及決賽全集中周末兩日，Franky與車隊早於賽事前一日就要抵達作出準備，首次見Franky，如果唔係因為着住車隊T-shirt，我只會以為係一個陽光男孩吧！說話謙虛又常帶笑容嘅佢，首次踏足東望洋賽道，又係喺眾多中國人面前出戰，怕唔怕失手？Franky即時以輕鬆語調回應：「有Volkswagen提供機會及全力支持，為嚟緊賽事已經作好準備，呢場更係首位中國三級方程式車手落場，自己會盡全力，希望明年再同車隊出戰。」反應快又大方，看似官腔嘅言詞其實出自真心真意，點解？「一個人在途上」遇上有車隊出手扶持力撐，自然會同對方交心，只不過為Franky出手嘅係一Team人吧。
坦白講，邊個唔知賽車係外國車隊主導吖，歐洲賽車水準更遠遠拋離中國。要出走中國，踏足人哋地盤，實力稍遜都唔得，Franky雖然年紀輕，但連車隊運動總監KrisNissen都話Franky係中國最優秀嘅車手。

■Franky係Volkswagen旗下首位中國車手。

■穿上戰衣，回望戰車，滿腔盼望。

■專程由外國趕來為Franky打氣嘅小女友Zha-zha。

外國參賽獨自面對

除了實力，毅力同信心亦都好重要。「好細個就已經玩高卡車，之後Daddy送咗去外國玩SummerCourse，之後俾車隊賞識，喺08年加入Volkswagen，正式成為旗下車手。」聽落漫不經意，背後故事卻說來不易，十幾億中國人，就係你，喺唔少賽事中奪標先至可以得人賞識㗎！尤其係喺外國比賽，孤身一人：「初初去到外邊，最大問題係得自己一個，好多嘢都要獨自面對同承受，尤其係外國好多人都係好年輕就成為車手，一早就得到完善嘅培訓同操練。以23歲而言，喺中國或者係年輕，但跑到人哋地方就慢咗好多，所以第一年係我最困難嘅日子。」大概因為這個原因，Franky對賽事更認真更用心，每次傾談，又或者傳媒採訪時，佢都回以燦爛笑容，態度從容，但當穿上戰衣、面對賽事時即變得相當認真。前後彷彿兩個人。
來到澳門，每日試車都會落場跑熟這條高難度街道賽道，「自己係第一年，但其他車手就早已作出準備，對呢條賽道亦相當認識，咁多高水準車手出賽，雖然好難話贏到，但就會以最佳狀態去完成賽事。」收到，事關每朝都係6點半就起床做準備，夜晚10點零就休息，喺場入面亦唔會四圍走四圍八，專注集中，一如佢自己所言，「Trymybest！」
現場所見，由練習至排位賽，當中有唔少意外發生，甚至出局，Franky唔係最出色，但每次都能過關、能完成比賽；決賽當日，Franky排於第十四行，以第28位發車，最終以41分24秒2完成賽事，最快圈速為2分14秒7，係第13位過終點，相對於其他「老手」，呢個成績算唔錯！

■賽事過程入面，不時留意情況。

■VolkswagenKrisNissen及Mr.Schadewald都力撐Franky。

■賽車靈魂──車隊技術人員。

■再上戰場，邊着衫都邊想策略。

■坐下來休息時，喝補充體能嘅飲料。

程叢夫小檔案

英文名：CongFuFrankyCheng
出生日期：15/8/84（24歲）
出生地點：北京
車隊：SignaturePlus

成績：先後多次奪得北京及全中國高卡車錦標賽冠軍、中國雷諾方程式錦標賽兩次奪冠、05年英國雷諾方程式錦標賽第三名，創下首位中國車手贏得國際賽事青年單座級賽車歷史紀錄、08年與隊友得到第76屆勒芒耐力賽優異成績，同年成為VolkswagenSignaturePlus首位中國三級方程式車手。

其他矚目賽事

今屆新增三項新賽事，分別係GT盃、路車挑戰賽，以及太平洋寶馬方程式，當中以路車及GT盃最可觀。
路車挑戰賽有唔少大家熟識嘅車手及車款出現，就連日本Spoon社長市璟樹先生都帶咗全球得一部嘅SpoonNSX-RGT出賽，可惜喺第二日嘅排位賽入面就撞欄而退出。
GT盃則有今年新鮮熱辣保時捷卡雷拉盃全年總冠軍，大家稱為波子王嘅歐陽若曦。Darryl亦不負眾望，以大熱姿態由練習賽帶到去決賽，無敵姿態勝出，更做出最快圈速。呢場賽事最精采的並唔係比賽過程，而係出戰嘅戰車，部部都係SuperCar，唔係拉利，就係波子、林寶等，車迷至愛。
至於另一重頭戲，FIAWTCC世界房車賽亦相當精采，未到澳門站已係冠軍人馬嘅SEATSport車隊旗下嘅YvanMULLER。大家還滿心期待西班牙SEAT車隊會唔會作出零的突破，喺東望洋贏番長勝嘅德國BMW車隊，以及前世界冠軍AndyPRIAULX。結果卻連番炒車，由美國Chevrolet車隊RobertHUFF勝出，Muller及Priaulx則分別奪得亞季軍。