港人瓣瓣都要快，吃喝玩樂連轉數都要快，個腦日日轉，好易Overheat，搞到自己失晒魂，有時連老竇姓乜都唔記得。吓？俾我講中晒？小心喎，可能你不知不覺間已經變成腦殘一族，唔信？玩個腦殘Game，就知自己個腦有無生草。
記者：王震遠
攝影：伍慶泉、陳陶鈞
協力：吳允冲、周靜雯
鳴謝：臨床身心行為學家李寶能
最新潮語Hit爆中港台
以前話人個腦有問題，極其量寸句：「你白癡！」今時今日應該寸佢：「你腦殘！」「腦殘」，原意指講嘢無邏輯、做事無厘頭等腦部功能障礙，後被轉化成侮辱性詞彙，寸人無記性、轉數慢、錯漏百出。呢個潮語Hit爆中港台，網上有唔少計算腦殘程度嘅測試，連帶電玩遊戲生產商都推出一系列訓練腦功能Game。
玩Game可以測試腦殘程度？聽落有啲懷疑，請教臨床身心行為學家李寶能，佢話：「都可以一玩嘅！呢個Game有12條問題，對住平面畫面做測試，屬靜態同運算性質，考到手眼功夫，測試到部份腦功能。不過腦功能除運算外，仲包括反應、平衡力、感觀、情緒控制等等，如果可以兼顧埋，呢個Game會更全面。」專家都話Work，大家不妨Check吓自己有幾腦殘，得個知字都好嘛。
測你腦殘
存活力
1）有無三個每星期必睇電視節目？
Yes：________________、______________、______________/No
2）夜晚九點屋企突然無水，未冲凉刷牙嘅你會點？
A：住酒店
B：打電話畀水務局
C：向鄰居或親戚朋友借宿一宵
D：到超市或便利店買水冲凉
E：乜都唔搞，直接大覺瞓
協調力
3）拎出兩支筆，筆尖分別放於右圖兩個「◇」，沿螺旋形軌迹畫到「▲」為止。計時，你用咗幾多時間完成呢？
答案：______秒
4）睇馬戲團，你鍾意邊個節目？
A：行鋼線
B：變魔術
C：空中飛人
D：吞劍同吞火
E：人頭伸入老虎口
記憶力
5）準備晚飯，你去超市買下列食物──番茄醬、粟米粒、紅蘿蔔、洋葱、麵粉、豉油、芹菜、秋刀魚。但你只買咗芹菜、粟米粒、麵粉、紅蘿蔔同秋刀魚，你究竟漏買乜呢？
即答，唔該。
6）望下圖10秒，合埋眼，唔准偷睇，默寫番5張啤牌嘅花同點數。
推理力
7）以下每一橫排數字都有關聯性，將你認為最合理嘅數字填入A-F格。
8）你認為杯上唇印屬於邊個？
表達力
9）你覺得佢擺呢個Pose同表情，有乜原因？
A：熱到就快中暑
B：功課多唔願做
C：考試差好Down
D：痔瘡發作
E：爬山爬到攰
10）你覺得佢見到乜？
A：外星人
B：樣衰大狗衝埋身
C：好耐無見嘅朋友肥過肥仔聰
D：皇馬輸波
E：鬼
觀察力
11）警方喺游泳池邊發現呢條曬到脫水嘅亁屍，你估吓佢在生時乜樣？
12）上圖（骷髏骨眼睛！）迷宮有5個入口，邊個入口最快到達終點？
分析
根據下列答案計出得分，請將12條得分相加計出總分。
1）揀No得0分，揀Yes，寫出1個得4分，寫出2個得7分，寫出3種得10分
2）A（10分），B（8分），C（2分），D（4分），E（6分）
3）需時少於5秒（2分），6-10秒（4分），11-15秒（6分），16-20秒（8分），超過20秒（10分）
4）A（4分），B（10分），C（2分），D（8分），E（6分）
5）答啱0個（10分），答啱1個（7分），答啱2個（4分），答啱3個（1分）
6）寫啱5隻（2分），寫啱4隻（4分），寫啱3隻（6分），寫啱2隻（8分），寫啱1或0隻（10分）
7）A=12，B=24，C=12，D=81，E=-3，F=63
答啱1個或0個（10分），答啱2個（8分），答啱3個（6分），答啱4個（4分），答啱5個或以上（2分）
8）A（6分），B（4分），C（8分），D（2分），E（10分）
9）A（8分），B（4分），C（6分），D（10分），E（2分）
10）A（6分），B（4分），C（10分），D（8分），E（2分）
11）A（6分），B（2分），C（8分），D（4分），E（10分）
12）A（6分），B（4分），C（2分），D（10分），E（8分）
0-30分輕微腦殘
你腦筋清醒，非常精明，無乜嘢事難倒你。不過咁，雖然你暫時未腦殘，但邊個敢包你第二日一樣精明？今日開始保養個腦，多玩腦力Game，咁先唔會變老人癡呆。
31-60分輕度腦殘
生活輕鬆，間唔中先會出現牛頭唔搭馬嘴、唔記得帶銀包出門、臨瞓唔記得校鬧鐘之類小問題，但大問題往往由小問題引發，都係多啲激活腦筋活動穩陣，以免他日殘上加殘。
61-90分中度腦殘
生活唔如意，行路都會打到褪，身邊朋友越來越少，工作量繁重。請快快補補個腦，玩多啲腦筋訓練遊戲，否則你會連乜乜紀念日、生日之類嘅大日子都忘記，轉數會越嚟越慢。
91-120分嚴重腦殘
腦殘程度勁嚴重，返工返學你都會睇錯路牌、搭錯車、下錯站、唔記得拎公事包……瞓多啲覺，三五七分鐘都好，一有時間就合埋雙眼攤唞吓，有錢嘅話，買番啲補品補吓個腦啦。
星級腦殘
a.江若琳──自認數字白癡兼轉數慢，好彩數字推理題唔係錯晒，輕度腦殘啫，唔使驚！
b.林峯──抱恙上陣玩腦殘測試，成績唔錯，佢好抵死咁話：「做得呢行人人都腦殘啦，因為要記對白記走位，個腦成日裝滿嘢。」
c.蕭正楠──腦殘之霸！Edwin數字推理題稍稍高分，佢話：「自己短處係記人名，今日見完嘅嘢，第二日已經忘記得一亁二淨。」
d.鍾嘉欣──佢話：「以前都有人讚過我醒呀，不過我好大懵，成日唔記得嘢，工作太忙又唔夠瞓。」睇分，都唔算嚴重啫，放心！
e.黃宗澤──唔知何謂腦殘，Bosco數學麻麻，不過玩測試好認真，諗爆頭依然繼續堅持，恭喜，佢個腦唔算好殘啫。
f.瑪姬──新城DJ瑪姬只屬輕度腦殘，佢話：「我同好多香港人一樣，噚日做過乜，今日都可能唔記得，要Markschedule幫手記低嘢。」
g.曹宏威──阿博士答第二題最搞笑，屋企無水供應，竟然選擇去馬會會所焗桑拿，雖然不失為好辦法，但慘在無呢個答案選擇。
h.Bob──新城DJBob出名搞笑，諗住做得直播節目，轉數一定夠快啦，點知No喎，佢話：「同大部份人一樣，依賴電腦同PDA記事，以前我記電話好叻，𠵱家無咗部手機等於無晒朋友。」死喇，Bob你好似衰退嘞！
買書做測試
《洋蔥頭腦殘檢定》（$73/商務）用台灣最Hit嘅msn公仔掛帥做主角，全書分存活力、協調力、記憶力、推理力、表達力同觀察力六個單元，盞鬼洋蔥頭會擺出唔同表情同Pose問問題，問題範圍包括生活例子Casestudy、考記性、背資料，藉以測試你腦殘程度。做晒咁多個單元測試後，會分析你所屬腦殘類型，徹徹底底講出你衰邊瓣，真係夠晒全面。
