遇着銀行職員sell產品，最緊要識得發問，唔係話想刁難一班前線員工，因為佢哋本身壓力都唔輕，但作為消費者、投資者，有必要清楚自己買啲乜，作為sell產品嘅亦要知道自己賣緊乜。
斷供會損失本金
上個禮拜，敏妮收到個推廣電話，位銀行職員話敏妮係佢哋信用卡客戶，所以特別醒畀敏妮一個儲蓄保險計劃。由於當時敏妮搭緊車，冇寫低個plan嘅詳情，大概記得位職員係咁講嘅，「你每日儲27.8蚊，10年後可以百分百攞番之餘，我哋會畀多5%你。仲有，喺呢段期間我哋仲會提供保險保障，就算你已經有保險都冇衝突，我哋會照賠。你平時有冇返吓大陸？如果有，我哋嘅保險都cover，咁你玩都玩得開心啲。當然大家都唔想有乜嘢事，但當多個保障，10年後冇事又可以攞番啲錢，我哋仲送多5%畀你。」
敏妮當時問：「咁如果我中途斷供，中止個計劃，可唔可以攞番啲錢？有冇罰款或者手續費？」位銀行職員話：「小姐，好少客會擔心呢啲問題，一日廿幾蚊，當儲蓄，通常佢哋都會關心10年後可以攞到幾多錢。」
先發問再落決定
敏妮再問：「咁即係中途斷供可唔可以攞番啲供款？使唔使罰錢？」位職員答：「我哋唔係叫罰款，你儲滿5年都可以攞番之前啲供款，但供唔夠5年，我哋會按比例畀番你。不過，好少人會諗中途斷供，當買個保障，10年後有多5%……」
呢位職員講得冇錯，敏妮相信好少人會問斷供嘅問題，一般都只會concern喺10年後可以攞幾多。但細心諗吓，一日27.8蚊，一個月八百幾蚊，一年成萬蚊，喺呢個時勢，隨時飯碗不保，點應付成萬蚊支出，斷供血本無歸，點都要諗清楚。再講，10年先得5%回報，你唔係咁sell敏妮吓嘩！
溫敏妮
http://wanmanli.com/blogs/