立法會噚晚時光倒流20年，一班88年嘅立法局議員，歷史性重回議事廳，連平日罕有現身嘅鄧蓮如女男爵都有出現。搞今次敍舊活動嘅媽打李麗娟話，幾年前馬丁建議，一班85年立法局議員喺05年敍舊，之後馬丁建議添食，88年立法局議員都要搞一次。結果媽打逐一打電話召集眾人，講到聲沙先搵齊人馬到場。
鄧蓮如同八方講，今次返港主要係開太古董事會，噚晚食完飯就走。佢透露早前去過長江三峽，「嗰度真係好靚，我好推介你哋去睇。」講到香港經濟前景，佢話香港前景比好多國家好，至少好過英國，因為香港有中國撐，「香港人唔需要太擔心，一定可以克服到困難。」
英國首相白高敦推出嘅救市措施大獲好評，鄧蓮如話因為白高敦做咗超過十年Chancellor，夠晒經驗。講番香港，鄧蓮如就話對煲呔有信心，「同GordonBrown一樣，佢都係有咁嘅經驗。」今屆立法會冇重返議會嘅馬丁、自由黨田少同周太、林偉強，噚晚都重返立法會。