為北京奧運開幕儀式「咪嘴」獨唱《歌唱祖國》而成名嘅9歲小妹妹林妙可,噚日穿上白短裙仔化身成「愛心之星」,同聖誕老人一齊坐上開篷車出席觀塘apm商場聖誕活動嘅開幕儀式,仲即席真聲獻唱聖誕歌《JingleBells》嘅中文版,同北京奧運主題曲《我和你》。
觀眾話歌喉一般
年紀細細嘅林妙可一舉手一投足都極具明星風範,雖然有啲現場觀眾覺得,冇幕後代唱嘅妙可歌喉一般,但佢獻唱期間確實非常淡定冇怯場,仲不時同觀眾揮手,演繹《我和你》時仲配合埋歌詞做手語。之後佢又親自挑選一件閃閃嘅白色裙仔做聖誕服飾行catwalk,見慣大場面嘅妙可仲學足行天橋啲模特兒姐姐咁叉腰擺甫士。
妙可話,今次係佢第二次嚟香港,覺得香港好好,風景好靚,對於首次喺香港表演唱歌亦覺得好興奮,但就當然唔及奧運演出時咁高興啦。不過,妙可嘅志願唔係做明星而係做醫生,如果爸爸媽媽同學或者朋友病咗可以幫佢哋醫病喎。