天業節水（840）受惠祖國谷內需、扶農強農政策，大把好世界，預期PE得3字頭，要買。天業主打祖國節水灌溉系統一站式解決方案，08年半年度（6月底止），集團純利輕輕倒退咗13%到3045萬銀（人仔．下同）。業績倒退，主要係上半年原料及燃料價格一支箭，影響到集團毛利，但要咁睇，踏入下半年，原料及原油價插水，成本紓緩，已經可望提高天業嘅溢利增長。
再講，北大人4萬億銀谷內需，尤其針對扶農強農，天業應該直接受惠。呢邊講緊成本紓緩，另一邊商機無限，此消彼長，天業肥過肥仔水。只係好保守計數，天業08年度純利只係keep住7030萬銀，預期PE都係講緊4.5倍。隨住強農政策反映，天業嚟緊兩年度，只係作20%複式增長，預期PE得番3倍咁大把。天業現價（0.7元）翻一番到1.40元，PE未有上到雙位數。
粵首食正環保國策
粵首環保（1191）08年度（7月底止）收入大升15%到兩億銀，兼虧轉盈3450萬銀，PE得番7倍幾。集團轉型環保業務，成績靚爆鏡。呢期所見，祖國公佈脫硫設施唔正常嘅電廠，細嘅唔在講，就連四大央企都榜上有名。粵首主打脫硫業務，照計食住環保國策，長做長有。又粵首NAV0.27元，現價（0.114元）折讓58%，同類A股，家陣講緊無折讓。粵首就算翻半番到0.17元，亦係未有耐到NAV水位。
錢雋