啱啱做完手術醫爆肺嘅謝安琪（Kay），喺屋企休息一日之後，噚日精神奕奕去到屯門舉行新碟簽唱會，原定佢會唱兩首歌，不過爆肺冇耐唔可以唱歌，所以改為玩遊戲，現場吸引500人圍觀，Kay話𠵱家唔可以受感染，所以有感冒咳嗽嘅人千祈唔好行近佢，fans仲送上迷你大聲公畀佢講嘢。
老公好心痛
因為唔想fans久等，Kay決定休息一日就復工，遲啲要做物理治療同照X光，觀察心臟有冇受到肺漏氣影響，以前最嚴重試過漏氣令左肺縮細八成暈咗入院。佢仲話醫生切咗佢嘅肺組織，望落啡啡灰灰似恐龍角咁。手術後Kay身上留有一排細孔，佢講笑話自己望落似木童笛，不過就唔擔心被人話係隆胸印。
至於Kay嘅老公張繼聰噚日到銅鑼灣出席商台活動，對於老婆阿Kay咁快復工，佢都有少少擔心，不過自己就因為有工作喺身，所以去唔到現場支持老婆，佢話：「自己病都冇咁擔心，佢𠵱家有兩聲咳，只要佢一咳就會好痛，自己見到都會好心痛，不過今次件事發覺佢係好專業嘅歌手，就算唔舒服都會擔心工作，我今日會打畀佢助手同佢保持聯絡，其實我覆sms都覆到手軟，自己體力亦去到極限，噚晚做拉闊騷仲開始胃抽筋，最後要食胃藥先可以出去唱。」