西甲上周六爆到七彩，皇馬客場爆冷0:1不敵華拉度列，教練蘇斯達行定上刑台，眼前掛住條O型粗麻繩！反而華倫主場2:3不敵希杭，爆出100倍波膽，教練艾馬利都視作等閒，呢個世界就係咁唔公平㗎喇！
教皇馬慘過陪大L
想公平？入得豪門HERMES手袋任用，就咪計較名份啦！正如上一任皇馬教練卡比路，都係贏完西甲都照炒。蘇斯達都應該有心理準備，唔係賽後點會話：「我好平靜。」平靜有兩種可能，一係睇通晒，一係睇化晒，唔知佢屬於邊類呢？
做皇馬教練真係慘過做大L女人㗎！皆因會長卡達朗吹水唔抹嘴，話買C朗、法比仔同韋拿……，結果全部冇影，仲俾人踢爆亂claim錢；總監米積杜域操縱轉會暗落格、隊長魯爾又一心為入球紀錄，於是皇馬就咁俾呢班友肢解、分贓。
仲有，皇馬一班後防剛康復之際，又輪到唯一嘅中鋒「雲佬」受傷收咧！今場佢哋變陣打4-3-3遭傳媒狠批，軒斯賽後仲話：「唔關態度問題事！」言下之意賴教練？佢48分鐘被對手突破傳中，隊友防守又甩人導致輸波，之後自己仲兩黃一紅被逐，又點計呀？！
球員叛變劇本冇變
年幾前蘇斯達風騷上「馬」，我求大俠就批佢嘅下場一定係問吊。無計，以佢我行我素性格，又點同球員、高層相處呢？當年卡比路罪名係防守差、打法悶、球星叛亂，睇番今季皇馬11場聯賽失17球，球員上周更爆發更衣室罵戰等等，成個劇本冇變過。
皇馬應該趁今周國際賽換教練，目前候選人有普度加、拉莫斯同前皇馬名將米高；不過都係嗰句：無論邊個上，下場都係等死。