轆Book：<br>電單車界保時捷KTM橙到嚟

轆Book：
電單車界保時捷KTM橙到嚟

一年一度由香港運輸工具歷史文化博物館主辦的「香港電單車節MotorcycleShow2008」，是香港機車界盛事，可以畀各大電單車ShowOff。由攤檔、私人車會、專營改車至政府部門，如消防或民安隊，都可樂在其中。

文：周致中
攝影：譚盈傑

機車界新勢力

今年的MotorcycleShow2008早前於中區舉辦，參展代表眾多，整個展覽場地擴展至雪廠街以西嘅一段遮打道，令觀賞者可以有更多嘅選擇項目。大部份參展單位都傾盡全力，將大量資源同心思都放喺攤位上，雖然係非牟利活動，參展單位仲要畀$500費用嚟分擔部份開支，但係大家還是盡情參與。
今年電單車節，除咗日本品牌Honda、Kawasaki、Yamaha、Suzuki等，歐美一眾牌子如Harley-Davidson、Ducati、BMW、Triumph、Piaggio等主力現身之外，仲多咗一股新勢力，就係外形獨特的KTM，例如重頭之作RC8，造型搶眼，似足蝙蝠車，如果話Ducati係機車中嘅法拉利，KTM就一定係機車界的保時捷。當中RC8論身價（約$19萬）同埋造工，喺歐洲跑車界可說數一數二。就現場所見，有橙色同潮爆嘅白色車身，十分搶眼，就算本來對電單車不感興趣的朋友，還是會被RC8的獨特線條吸引。

■電單車展除咗靚車，又點少得有靚女助陣。

■KTM除咗有RC8呢個得意傑作之外，當然唔少得SuperDuke990R，如果蝙蝠俠拍新一集需要新蝙蝠電單車，非佢莫屬。

■KTM嘅RC8在外形設計上確實較一般車種前衞大膽，耐看度高。

■錶板設計完全電子化，顯示引擎轉數、行車里數、水箱溫度等，有型！

■RC8嘅座位一睇就知係落場格，除此之外，喺設計上仲可以調校高低，照顧到不同人士需要。

綿壇新貴PGO

跑車啱睇卻唔易揸，不如看看親民一點的綿羊，揸綿羊可算是近年電單車潮流之選，由嬌小車身到龐大身軀，款式極多，就車展所見，由舊款嘅綿羊仔（原版）到激改嘅豪華羊，悉隨尊便。論車展焦點，不得不提有Sporty跑款羊，例如PGO嘅G-MAX就相當惹車迷垂涎。其實來自台灣嘅PGO喺04年已經推出G-Max150，經過幾年嘅改進，08年更喺英國推出最新嘅F1特別版，車身配色有F1味道外，亦都加入步進式液晶錶板，獨特之處係用上「動態點火系統」，簡單講，就係耗油低而又唔會減低本身應有嘅速度，綜合各方之大長。

■PGO嘅G-Max經過精心打造，環抱式車體配六連桿中置氮氣避震器，同級之中可算超值。

■PGO最吸引之處莫過於用上美國航太科技嘅「動態點火系統」，以車價$26,000-$27,000來講，相當吸引。

改裝車搶眼

■另類口味，成架車都放滿大小不同嘅閃閃鑽石，心思就有，好睇與否就見仁見智。

■呢架改裝車，完完全全突破咗一般人對電單車外形上嘅思維，條尾胎差不多有私家車胎咁闊。

■粉藍配白色，改裝配件簡單有力，又係一個字「型」。

■唔好以為電單車節就係得電單車睇，眼前呢架大怪獸，一樣喺車展入面嚇你一跳，引來群眾拍照留念。