近日返港開會嘅鄧蓮如女男爵，喺星期六晚飛返英國之前，專程抽咗少少時間重返立法會，同88年立法局議員喺議事廳敍舊。鄧男爵20年如一日嘅fit一世身形令唔少議員好驚訝，個個都羨慕時間對佢似乎特別好。有份出席聚會嘅鄉議局副主席林偉強就話，嗰日好多男士翻睇舊相，都大嘆歲月不饒人，例如田少同譚耀宗都笑自己好似大咗成幾個size，同鄧蓮如邊有得揮？
一班舊朋友聚首，離不開話當年。林偉強話唔少老鬼都懷念以前個議會，好似和諧啲，冇咁多爭議喎。唔知道鄧蓮如係咪都有同樣諗法，但肯定嘅係佢好珍惜呢班老友，臨走時依依不捨叫大家路過英國記住去探佢。