發展局噚日安排立法會議員參觀邊境禁區了解未來規劃，幾個冇回鄉卡嘅泛民議員，包括卿姐、阿涂同何秀蘭，踏入禁區卻不能闖關，同祖國始終差一步，只能夠沿邊境線一日遊。幾個人望門興嘆，喺蓮塘附近背靠祖國影番張合照聊作紀念。
大好河山得個睇字，卿姐向同行嘅鄉議局主席發叔求助，叫發叔幫手替泛民向阿爺說項攞回鄉卡，發叔喺適當時候撞聾，笑笑口當冇事發生過。卿姐話以為去到蓮塘/香園圍新口岸選址，可以去晒中港兩邊視察，原來發展局冇安排佢哋過境。卿姐話對上一次最接近祖國，要追溯到葉劉仍然做保安局局長年代，當時葉劉帶隊參觀沙頭角中英街。