二○○八年踏入第四季之後，甚麼事都不再一樣，雷曼不見了，AIG死咗火，美聯銀行畀富國銀行吞併，黑人成為下任美國總統……香港有咗雷曼風波，搞到滿城風雨；中國唔再講宏觀調控，突然推出四萬億元刺激經濟方案。今時今日，如果再講幾個月前如何如何，真係out晒。老友行街Ａ對營銷部上司講：「我哋今年頭三季業績都唔錯吖，最後一季死守咪得囉。」點知立即畀上司省：「董事總經理已經日日面黑，諗緊明年冇米落鑊，呢排我哋與買家傾明年訂單，無人肯commit（承諾），𠵱家連○九年銷售預算都做唔成，你仲講今年頭三季好景，話唔定公司要裁員㖭呀！」行街Ａ嚇到唔敢再出聲，急忙告退。
金融海嘯冚低銀行之後，餘浪沖死好多邊緣公司。美國一間幾出名嘅CircuitCity（由一九四九年創辦之電器零售連鎖店）申請破產保護令，情況類似香港嘅泰林。CircuitCity當然大好多，彎咗之後，好多日本韓國嘅名牌電器電子產品商大吃一驚，電子界人士聽到消息話南韓三星有好多貨賣畀CircuitCity，銀碼巨大，為之驚得一陣。大概在今年如此環境，過往一年愈係進取，勇於爭取市場份額嘅廠商，受損最大。「不做不錯」呢句說話，以前係懶人嘅托詞，想唔到突然間管理人嘅最佳座右銘。
情形突變，唔好再緬懷上半年之好景咯。所以呢排逢係睇到有股評人寫：「一百八十天平均價有咁多，冇理由今日出價咁低」之類，就忍唔住笑。是但搵隻大藍籌股，例如滙豐、港交所、中移動等等，比較吓一百八十天平均價與今個星期收市價，有幾大差別呀，講半年嘅平均價實在毫無意思。
目前最主要嘅係睇未來一百八十天，美國經濟朝甚麼方向發展，聖誕銷售是否好唔掂，美國人是否卒之不再亂花錢，識得儲蓄。儲蓄本係好事，但美國經濟倚賴消費過甚，如食慣鴉片，一時之間難以戒除，一旦美國人唔消費，我哋珠三角嘅企業會遭遇另一場海嘯，大家有現金就要保住嘞，可以套現嘅股票，不必與之談戀愛。