北大嶼山第24個郊野公園日前正式開放，環境局局長邱騰華邀請煲呔一齊去參觀。金融海嘯加上民望急跌，處於弱勢嘅煲呔心情自然唔多靚，去郊野公園視察兼順道散心就最好不過。當日煲呔都係坐唐唐極力推介嘅昂坪衫碌拎去到昂坪市集，仲喺嚮導身上八卦到，原來大嶼山早期叫做「爛頭山」，單睇個名就諗到當時有幾咁唔靚，唔似得家陣咁一片青葱翠綠。
自由行去到昂坪會買嘢，但煲呔就沿住行山徑散步兼散心，仲喺個自然中心入面攞咗好多遠足「貼士」，其後又入咗心經簡林，可能係想喺施政低潮中搵吓啲心靈慰藉都未定。佢話政府會繼續搞好綠化工程，人人有山行。