每年呢個時候，大學會宣佈頒授榮譽博士學位，人選名單多數係飽學之士，文化界領袖，知名教授，社會大老，對大學曾有捐獻之富豪或對香港社會有貢獻之人物等等。今年香港大學頒授榮譽博士學位予克林頓、姚明、何大一，就比較特別啲。何大一係愛滋病專家，發明「雞尾酒式治療法」，飲譽世界，曾一度被邀請競逐做港大校長，到過港大做研究，港大畀榮譽博士學位佢，一啲都唔奇。但克林頓係美國前總統，對香港及對港大有何扶助呢？如果因為佢係西方政壇重要人物，咁以後本港大學或者可以頒授學位畀埋英國貝理雅，中國胡錦濤更加唔少得（如果佢肯攞嘅話。）
克林頓都算啦，政治領袖總係秤先啲嘅，世界上有不少先例。姚明如何呀？姚明打籃球係中國國寶級，體育精神又好，打NBA係好辛苦嘅，但中國每年徵召佢入隊，佢都冇抗拒，以傷疲盡起嘅態度，為中國國家籃球隊搏命，佢嘅fans睇到，既心痛又愛惜，但係港大榮譽博士學位噃，總覺得扯不上邊。美國籃球之神米高佐敦肄業於北卡羅連納大學（讀咗三年），一代中鋒伊榮（侯斯頓搵過伊榮做姚明教練）畢業於喬治鎮大學（Georgetown），天鈎中鋒渣巴畢業於UCLA。三位籃球名人堂人物，讀大學時各為母校打NCAA，立下汗馬功勞，但未聽聞過呢三間大學頒授榮譽博士學位畀自己嘅最著名籃球明星。或者係物以罕為貴啦，香港大學特別珍惜中國籃球之寶姚明，快過姚明故鄉嘅上海復旦大學、同濟大學、交通大學等等，一於頒個榮譽博士畀佢先。
NBA已經開賽，賽程緊張，幾乎晚晚有比賽，姚明唔知有冇時間飛嚟香港接受榮譽學位呢？如果佢能夠飛過嚟，咁就好咯，體育記者、港聞記者就有一位新聞偶像可以追訪，起碼有兩日新聞可做（估計姚明頂多可以逗留兩日，或者只有三十六小時），姚明加上克林頓，港大頒授學位典禮有十足星味吸引力，必定吸引大量記者採訪，如果姚明能到港大籃球場練習十五分鐘與港大籃球隊玩一玩，學生得益更大，左丁山雖然與港大無關，但係本港姚明球迷諗吓亦覺興奮！