著名電台節目主持人陳海琪，近日忙於處理其有份投資的網上電台電橙（http://www.omlive.cc）的開台事宜，她在該台主持久違多年的節目《海琪的天空》。海琪日前接受本報記者專訪時第一句便說：「唔會再做第三次！」皆因她經過當年接手做新城電台台長，今次由零開始，她笑說沒有精力再面對沉重的工作。但看海琪成立電橙雄心勃勃，聽她笑說當中的苦與樂，就知她從沒放棄廣播事業。
陳海琪近日在其有份投資的網上電台電橙重新開咪，主持昔日當紅電台節目《海琪的天空》，她透露幕後有大財團支持，卻不肯透露投資金額，她說：「我哋除咗網上聽到同睇到節目外，我哋亦擴闊咗個平台，嚟緊手機電視會睇到啦，下個月全歐洲嘅華人寬頻電視會睇到OMLive。」據知廣東省的手機都可聽到。海琪的目標是電橙能成為網上電台的先驅。
彈保母未夠班
海琪表示成立網台初期，嚴選節目主持人的時候，遇到不少莫名其妙的人，她笑說：「有名嘅我見過，薄有名氣嘅都見過，佢哋周遭都有一啲保母扮經理人嘅人，佢哋都唔知乜嘢叫電台工作，我冇理由同呢啲人傾，又永遠見唔到真人，咁點呢？佢哋都未有自己嘅人生，就幫藝人去建立藝人嘅人生，唔好講笑啦，我哋又唔係佢嘅親戚，無謂咁堅持啦，惟有放棄囉！」海琪曾遇到一些薄有知名度的藝人，對她提出奇怪要求，她說：「佢問我喺度做，會唔會有戲拍，咁我唔係電影公司嘛，我咪好善良咁同佢講，當你做咗一段時間，拍戲拍劇都係必經階段囉，點知佢再同我講要guarantee（保證）喎，有啲就問我會唔會有月薪，仲話之前搵開幾多，要我畀嗰個數佢，唉，我哋呢啲小本經營㗎咋！」不過她已找到她認為有潛質的節目主持，包括莊思敏、李逸朗、譚俊彥及葉山豪等。
談到新一代藝人，海琪感到現時娛樂圈已經沒有像梅艷芳、張國榮等耀眼的明星，她說：「𠵱家啲所謂明星好面目模糊，唔似以前張國榮帶住副超喺條街度，喺架勞斯萊斯度落車，全條街啲人都會震晒，𠵱家真係冇喇！其實𠵱家嘅藝人都好值得同情，唔係你匿埋唔見人，而係製造唔到流行風潮。」
現時的電台工業日漸式微，海琪有感而發說：「佢哋（電台高層）唔可以唔面對，呢個世界已經慢慢俾互聯網取代，人嘅生活習慣都唔同以前啦，佢哋聽唔到喪鐘係佢哋嘅問題。我喺02年之前，喺港台做緊《海琪的天空》時，我已經同上面（港台高層）建議要做livechat，例如用icq，但俾佢哋拒絕咗，之後我咪抽出節目嘅其中一日做《海琪相談室》，唔係我解答聽眾嘅問題，係A聽眾有問題，由B聽眾去解答，嗰陣時都好hot㗎！」
轟港台冇方向
海琪指現時整個香港電台均沒有節目方向，她說：「咁多個台都好似做緊同一樣嘢！」記者指港台的節目方向是希望藉節目內容教育聽眾，但海琪即表示：「呢啲咪官僚囉！」她解釋雖然港台有多條頻道，有不同語言，但港台高層沒有與節目主持人溝通清楚內容是否可行，她說：「歸根究柢，節目內容先係最重要，老人家台又唔係只係做老人家聽嘅節目，又唔知邊個台做畀年輕人嘅。」
海琪又慨嘆現時沒有真正的廣播人，她說：「𠵱家電台充斥咗藝人，藝人嘅意思係佢哋都係做電台節目，但佢哋百足咁多爪，佢哋點樣可以做好節目呢？我相信你花十年去專注做一樣嘢，一定可以闖出一片天地，但不得不承認，呢個亦都係時代嘅改變。」
撰文：懷鈺
