要花幾多能量，才能將荒土變成新興潮區？
要花幾多能量，才能將新興潮區再次夷為平地？
我每次經過尖東，都有這樣的感慨。
本來是填海填回來的爛地一塊，我真的不覺得它做了甚麼，一夜之間變成我中學時代前衞少男少女日蒲夜蒲的樂園，穿得樣衰一點那天，雙腳還真不敢跨過漆咸道，生怕沾污了潮流聖地呢……坦白講，其實怕被區內結集的型人取笑先真。
曾經在hip界最頂尖處的區域，我真的不記得它又做了甚麼，總之某一日醒來，我就發現自己好像10年也未踏入過這一區了，OKay，準確一點講，工作關係也有去過一兩次吧，被人約去食飯（即是不是我主動揀的）也有一兩次吧，坐車經過急尿落車借廁所或買煙買汽水也有一兩次吧，但講到購物，超過10年來真的沒有一間店試過可以將我引入尖東。
「感慨」兩個字並非言重，曾經咁潮並且聚集咁多年輕人氣與人流的地方，照計要好出力才可以在短短幾年間趕走所有fans，尖東又不是鬧鬼又不是傳染病又不是治安特差，潮流特區的全盛時期為甚麼過不到千禧？相等於今日裏原宿或whatever潮區的型店，就算一個月執一間，到底是龍頭的旗艦，那三斤釘應該拆十年八年吧，還未計中途有飛來釘加入補充軍容呢，怎麼可以話消失就消失，之前還好哋哋的時代地標，怎麼睇少一陣回頭一看就變成一個幾乎全中年趣味的舊區？
尖東，大概相等於香港潮界的龐貝城。
Simon嗰陣時
講起上嚟，喺尖東都算做埋做埋唔少型嘢㗎。
──每人讀書時，總有一班邪同學一班正同學，我的邪同學當然和那個時代每位自命型仔的男同學一樣，英文名叫Simon。Simon住蘇屋邨，其實是個唇紅齒白高度線條勻稱的靚仔，着衫很有型，雖然全部旺角荷李活商場訂做，但全部抄足Johnny事務所的新紮日本明星造型，Simon常常自稱與社團有關聯，但一去到波樓之類「雜」少少的地方就先走，只蒲NoonD媾女居多，常常自誇和當時的少女偶像拍過一陣拖，我唔信，直到我後來進了娛樂圈有機會問問被傳的當事人認不認識這位蘇屋邨Matchy頭靚仔Simon，係咪拍過吓拖，袁潔瑩說：「識！係！但好多年之前嘅事lu！」
Simon揀我陪他去尖東，大概因為他手下其實冇𡃁的原故吧，雖然其實嫌我有少少肥，着衫又老土，但冇馬仔出場未免寒酸，惟有先點我去當時另一潮地海洋中心Birds時裝店的男裝部Attitude執件衫才能跟他去威，結果我以59蚊揀了件很似今季N.Hollywood的漫畫書print的恤衫，Simon才覺得我合格。
髮型方面，他都嫌我薯，要我去當時型人必去的麗花salon剪剪先，我話冇錢，他居然替我在金巴利道找到一間同集團的麗花髮廊Rev囗rSalon髮型學校，洗剪吹只係15蚊，我個心諗咁筍？平時兩百幾蚊揩一揩，點解今日十分一都唔使，應該事有蹺蹊吧。
想不到來的是個出名的大師傅（因為在報紙廣告上好像出現過的，我認得），而且一來就以純熟的技巧剪出了近藤真彥那堂蔭配頭頂一支支豎起的海膽，還物超所值地加送後尾枕髮腳的doublecut，即是將頭髮剪到一級級窗簾咁，嘩，我心想今日遇到大師咯，仲唔係行好運，點知就在我滿心幻想陣間點樣去尖東，同班型人討論HumanLeague嘅《Don'tyouwantme》之時，大師傅突然收剪，並擰轉面同一個一直有在場觀望的馬來西亞師奶說：「嗱，左邊我剪好嘞，右邊你照剪！」哦，原來就係因為咁15蚊，只是那位嬸嬸連廣東話都未聽得明晒，居然震震地嘗試替老師完成偉業，換句話說，我付了15蚊畀人將我個頭較飛。
結果Simon勉強肯同我去尖東見班friend，條件是我行街時候右臉要盡量貼牆，陣間坐低飲嘢時一定要用右手托頭……
六支羅馬柱
老實講，這個蘇屋邨Simon我當時是幾崇拜的，他連集合地點都有型過人，竟然不是天星碼頭5支旗杆而是尖東4條大柱（還是6條，我真係唔記得了），總之依時到那裏等的，居然只是兩條女，仲係同校高我和Simon一級的兩名飛女，電粟米頭（如果你還記得乜嘢係電粟米的話）、尖頭鞋、超短半截裙、大白圓框眼鏡，身上還有兩隻梳，一隻洋葱片形的抓住鬆獅頭，另一隻正常膠柄用來插在褲頭裙頭，突了一截出來，得閒掹出來梳一梳或削一削，和Simon那隻一樣。
去邊呢？原來年輕人在過去20年都沒有進化或退化，一樣是約了班「型人」friend出來才醒起唔知想去邊。
結果有人提議去Shakey's（Pizza），結果去了有pizza食、有機動遊戲玩、有豆泥公仔贏，兼有細路可欺負的出奇老鼠樂園……講番起，我都覺得悶，都唔知點解當時會覺得咁係正統最模範的「尖東潮人周末」。
否則1988年柏安妮小姐又點會有首hithit哋嘅跳舞歌《尖東》呢？（還有首唔係幾hit嘅吳夏萍慢歌叫《尖東海旁》呢？）
（待續）
本周贈品
這星期這批尖東開場未加甚麼時裝購物的材料，下期才是正戲。
先付點上期吧：我記得自己最後一次專程去尖東買甚麼衫，大概是95年W<最紅的時候，紅到竟然在尖東開了半間專門店（其餘半間好像是同ReplayJeans分），為了買到中環D-mop未必有的款，結果特登過海去這個其實已經很少來的尖東，就是為了這個心愛的牌子，當時W<出了一批七彩羽絨被做的長身拖地大衣，舒服到好似冚住張被出街咁，所以我買了4個顏色，最後自己一件都冇得keep，因為身邊不斷有朋友出現話好靚好靚，都撒嬌要我送，而我竟然全部都肯，其中送得最開心的一件，是送給了一位初來香港無親無故也未必賺到甚麼錢，當然也不會認識W<這種奇怪名牌的性感女星，我估現在講起這件事，今日的舒淇小姐已經全無印象了吧。
Textby黃偉文
