澳門近期最火熱的話題，莫過於金沙集團受財困影響，炒幾千人。所以他們派出的賽車女郎，昨日亦成為全場焦點；金沙及威尼斯人加埋共8個車模，全日被傳媒、拍友圍攻，其公關人員好像趕鴨仔般應付人群，狀甚好笑。當然，此情此景不接受訪問亦不難理解，但現場還有數之不盡的靚靚車模，那些業餘拍友仍要與攝記鬥搶位，人影你又影，一味唔蝕低。睇怕賽會有必要在來屆檢討，實行在維修站內控制人群了。
《花絮》
綿羊仔亂闖賽道遭扣查
賽事期間嚴禁進入跑道，相信無論係觀眾，定係工作人員，都知亂入賽道有幾危險。不過昨日賽會有項聲明，話一個駕駛綿羊仔嘅澳門巿民，賽事期間闖入賽道，結果被警方帶返警署扣查，你話幾無謂呢。
㗎仔門面工夫做足
日本輪胎廠都算唔話得，除贊助飄移示範，佢哋嘅攤位亦有海報、扇仔等小禮物派，咁都唔止，工作人員仲會好細心咁幫小朋友貼印水紙。日本人門面工夫做足，真係抵讚。
澳門小姐避見車
格電屬國際大賽，賽會特別邀請今屆澳門小姐及國際小姐3甲任頒獎嘉賓。話晒係選美出身，質素點都高過車模幾班。不過唔知點解，呢班帶晒后冠嘅佳麗，頒完獎即閃，唔敢落維修站同班車模一較高下。