謝安琪（Kay）之前曾經爆肺，日前第四度爆肺，上星期六入咗九龍聖德肋撒醫院做手術，而老公張繼聰（Louis）就晚晚到醫院過夜陪老婆，細心照顧Kay。經過連日嚟休息後，Kay噚日終於出院，不過Louis因為做嘢就冇出現，Kay由經理人同助手陪同下現身並接受訪問，雖然做完手術冇耐，但係Kay精神算唔錯，化晒妝出嚟，十足平時出騷咁嘅樣，不過行路就明顯慢啲。
問到身體狀況，Kay話：「好好多，要休息兩個星期，不過聽日𠵱然會出席簽名會，只要唔係唱歌，我都會盡量做。」不過醫生都叮囑Kay唔可以辛苦同喺嘈嘅地方留太耐，咁康復都會快啲。
唔關無綫事
問到關唔關之前為無綫去拍《冰天動地》成日飛嚟飛去辛苦，所以搞到爆肺？Kay話應該唔關事。至於會唔會再爆肺？Kay話：「今次手術做得好好，康復都OK，醫生話再爆嘅機會都好微。」Kay表示自從朋友知道佢爆肺入醫院後，好多人都傳短訊畀佢，佢話令到大家擔心都好唔好意思，總之佢會好好保重身體。
採訪、攝影：胡比
