金融海嘯人人自危，但並未影響城中一班富豪鬥車族。難得澳門大賽車首次舉行GT盃，身價過百萬港元的林寶堅尼、法拉利、保時捷及阿士頓馬田悉數出籠。銀行家馬清揚（Philip）表示：「車迷少咗、氣氛淡咗，酒店易搵咗，但係冇影響我參賽嘅興趣。」記者李勇明、黃冠華澳門直擊
「我這架阿士頓馬田型號是VantageN24，是專用來鬥耐力賽用，馬力相對林寶堅尼、法拉利的500匹，少了接近100匹，所以沒有想過爭標，遊車河還可以。」這位大新銀行太子爺說。
「暫忘投資失利」
Philip除了是澳門大賽車常客外，過往幾屆均會參加兩個以上比賽，但今年賽會改例，每車手只可選擇一項賽事出戰。「其實來澳門基本使費都要10萬，當然車價另計，今次參加的GT盃，淨車價要8萬英鎊（約92萬港元）。」
另一位香港車手游紹賢（Eddie），豪花200多萬港元，購買一輛專為比賽用的林寶堅尼GallardoGT3來澳門參賽，這位本身從事空運行業的SPS車隊成員說：「金融海嘯無影響就假，我自己啲投資都有失利，損失幾多唔提喇，唔開心嘅事暫時忘記啦！」
首次來澳門比賽的Eddie補充：「其實我們這班超級跑車愛好者，之前一直都有在東南亞地區比賽，難得今年澳門首次主辦GT盃，當然要支持。」
場內車手暫時忘卻金融海嘯引起的煩惱，場外的觀眾亦沒有以往那般熱烘烘。不過，對比起首日練習賽，這天的人數明顯有所回升，澳門賽車委員會協調員安棟樑表示：「其實我們的門票銷售得不錯，比去年有百分之十增長，預計周六、日將有更多車迷入場。」
門票銷情有10%增長
對於金融海嘯有否影響商業贊助，安棟樑回應：「金融海嘯來得比較快，對今年的企業贊助並未帶來影響，至於來年則暫時未知。」
回說賽事，被譽為GT盃奪標熱門的香港車手歐陽若曦，完成首節練習賽後表示：「今年GT盃的參賽車手比較多，經常會出現慢車阻快車的情況，所以明日排位賽希望造出最快圈速，周日正式賽事才可以一帆風順。」
參加澳門GT盃基本使費（3日2夜）
報名費﹕$15,000 澳門食宿﹕$10,000
兩套輪胎﹕$30,000 維修人員薪金﹕$20,000
車價﹕$1,200,000至$3,000,000
註﹕車價視乎車種，全部不連稅
《花絮》
李英健今年齋講唔玩
今年冇參賽的香港車手李英健（左），噚日亦有現身澳門，不過證件就由車手轉做media；Marchy今年幫免費電視講車，佢入到記者室同行家打招呼，話喺碼頭時見到唔少車迷，唔少人仲同佢加油，同問佢架車響邊時，Marchy笑笑口話，架車泊咗響港澳碼頭。
車隊戰衣T恤有捧場客
時勢唔好，車隊為咗幫補水腳，就喺維修站做小販，賣自己車隊的戰衣同T恤，每件由$70至$150不等。有車迷同小記講，雖然車場外都有其他地方賣賽車用品及紀念品，不過格過價後呢度平啲，所以不乏捧場客。
路車挑戰賽快慢有別
今年新增的路車挑戰賽，雖然好多車香港街上都見過，夠晒親切。不過，話晒都是賽事，好似26號車手翁厚垣揸架寶馬Z3開篷跑車參賽，排位賽最快都係3分17秒172，比最快嘅李松勝慢足37秒，真係唔夠專業囉！
