從未接觸過Hellboy的話，或會誤以為佢係紅色嘅變形俠醫故事。事實並唔係咁，Hulk係怒漢，Hellboy卻係諧星，打起上嚟亦都無火。咁新出的《HellboyⅡ》DVD睇得過嗎？特技造型係有，似《魔戒》加上《第五元素》，但有人性無魔性，感覺好奇怪，因為天魔竟然要借酒消愁唱情歌。
記者：陸俊雄
為情受傷無比動聽
怪物都唔一定要好勇鬥狠啫！雖主觀認可但客觀唔接受。稱得上地獄之子點都應該有部份魔性先好睇！或者《HellboyⅡ》只係一個過渡，因為留定條尾等下集，暗示Hellboy會破壞人類世界。
今集無火性格相當鮮明，多愁善感間中搞吓笑的Hellboy，最出位一定係同老友阿伯（條魚怪）一齊隊啤酒，仲跟住CD唱情歌。事緣係阿伯掛住精靈公主先，Hellboy既因為人類視佢為怪物，加上同女友又鬧過場交，於是隊啤發洩，好人類行為呢！故事就係要話畀觀眾知，Hellboy在人類世界生活咁耐，思想行為早就同人無分別，所以唔應該排擠佢。
最威追打黃金甲
之但係唔好以為《HellboyⅡ》變了文藝片，佢一樣有幾場大戰，最尾一場打黃金兵團最有睇頭。不過套片顏色濃度太豐富，呢幕戲紅得好厲害，同發哥套黃金甲的黃金色，明顯唔同。
如果嫌Hellboy打得唔夠力量、唔夠有型，要留意努瓦達王子一角，佢耍劍好有中國功夫味道，同一般鬼佬打交格鬥戲有好大分別。另外有群牙仙殺人那一幕，令人聯想起《奪寶奇兵4》的紅火蟻也值得留意。不過開場成20多分鐘先有第一幕官能刺激，期望一如以往荷李活式一開波即打一場勁先？又會覺得古怪。
