美國選民選出史上首位黑人總統，同樣係有色人種嘅港交所主席夏佳理，如果出選香港特首亦可能有運行，有機會創造歷史。夏佳理老竇係南亞裔人士，媽咪則係廣東人，不過夏佳理噚日話香港人唔好望香港「變色」，因為佢冇興趣做特首。
夏佳理噚日接受香港電台訪問，話佢自己冇興趣做特首，因為條件唔夠。佢話做特首最緊要睇能力，分析過自己能力後，認為未夠班。夏佳理咁講真係風趣，佢喺金融界、法律界、政界，甚至喺馬圈都甚有地位，回歸前曾問鼎律政司司長，可惜北京揀咗梁愛詩，如果當年已經有位黑人美國總統，歷史可能已經改寫。雖然年近七十，夏佳理話暫時冇諗過退休，退休後想創辦智庫，圓多年心願。