浸會大學傳理學院作育英才40年，噚晚舉行創立40周年慶祝晚宴，同時頒發傳理教育先驅獎同傑出傳理人獎。創系系主任余也魯、電視新聞教父黃應士同時獲頒傳理教育先驅獎，兩人喺新聞界地位崇高，現時好多獨當一面嘅傳媒人都係佢哋徒弟、徒孫，噚晚接受獎項時，全場人起立鼓掌，場面十分感人。
傑出傳理人獎分「新聞媒界」、「電影電視與文化」、「公關廣告傳播」三個界別，共有40人得獎，《蘋果》老總鄭明仁同高級記者雷子樂雙雙得獎，《蘋果》有兩位傑出傳理人，八方都戥佢哋高興。新聞之花陳凱欣日前同前新聞王子邱文華結婚擺酒，噚日陳凱欣都有攞傑出傳理人獎，好事成雙。
鄭丹瑞俾黃應士「嫌棄」
浸大傳理系人才濟濟，「電影電視與文化」傑出傳理人鄭丹瑞噚晚自爆，當年佢都有申請入TVB做記者，由黃應士面試，結果吉叔揀咗人稱「花仔」嘅袁志偉，唔係因為袁志偉靚仔啲，而係因為「鄭丹瑞講嘢冇人信」，阿旦話如果佢入圍，袁志偉嘅第一代新聞王子地位，早就拱手讓咗畀佢，TVB新聞部話事人亦可能係佢。阿旦有言在先，佢講嘅嘢，信唔信大家自己諗清楚。阿旦又話當年，做系刊《新報人》記者，被師兄李居明老點去搵屋邨色魔，結果無功而回，搵幾個互委會訪問就交差。