44歲的黎耀祥，入行20餘年，雖然還未試過在無綫台慶頒獎禮上贏得任何獎項，但演技早已獲得觀眾認同。今年祥仔憑《秀才愛上兵》提名明日舉行的無綫台慶《萬千星輝頒獎典禮》之最佳男配角，獲圈內圈外一致睇好，攞獎機會幾乎是十拿九穩，但祥仔卻說信心不大：「評審委員會係一個原因，甚至公司大氣候都係一個原因，即係要睇公司行緊乜嘢制度同乜策略。」撰文：戴彩煥
憑《秀才愛上兵》一人分飾戴從文及戴從武兩角的黎耀祥，在明日舉行的《萬千星輝頒獎典禮》中，與周驄、秦沛和郭政鴻等好戲之人爭奪最佳男配角，雖然賽果還未公佈，但近日祥仔不論開工還是走在街上，同事、街坊都幾乎跟他恭喜道賀，深信祥仔今次攞獎絕對十拿九穩。對此祥仔日前接受訪問時說：「係好多人同我講，有日撞見郭晉安，佢話投咗我票，叫我到時上台記得多謝佢。亦有好多街坊、特別係公司好多幕後嘅同事，都叫我唔好嘥咗啲掌聲。」
受制大氣候
不過，雖然被一致睇好，但問到祥仔攞獎信心多大時，他竟說：「現實嚟講，信心係冇嘅，因為現實係現實，觀眾票數係一個原因、評審委員會係一個原因，甚至公司大氣候都係一個原因，即係要睇公司行緊乜嘢制度同乜策略。好記得有年美國奧斯卡頒獎禮，影帝同影后畀晒黑人攞（編按：在02年舉行的第74屆奧斯卡頒獎禮，兩位黑人演員丹素華盛頓及荷爾芭莉榮封帝后），邊度有咁蹺？大到美國電影工業都要顧慮政治因素啦！大家成日鬧TVB，其實對TVB唔係好公道，個遊戲係咁玩，要睇吓乜嘢時候吹乜嘢風，如果吹民主風，TVB咪唔敢有違群眾意願。
「等於98年嗰屆香港電影金像獎（即第17屆）嘅最佳電影、最佳導演同最佳新演員都畀陳果嘅《香港製造》攞晒，但係咪好到咁緊要？當年杜琪峯嘅《十萬火急》拍得好好，我好睇好，點解畀晒陳果？因為當時電影市道太低沉，想鼓勵多啲新創作，呢個就係我所講嘅大氣候。不過，雖然我咁講，但都希望攞獎嘅。」
認同當攞獎
問到越多人支持，會否越感到壓力？祥仔表示：「壓力唔係攞唔攞到獎，而係畀唔畀到好戲觀眾睇，我諗觀眾唔會介意你攞唔攞到，而係你做得好唔好，我從來都唔覺得攞咗獎就係好成績，只要自己知做得好唔好、人哋知道你做得好唔好就足夠，如果你做得唔好都攞獎，咁咪盞搞！觀眾認同自己，我已經當攞。」
在《秀才愛上兵》中一人分飾兩角，是祥仔從演以來第一次，也是拍得最辛苦的一次，他說：「真係拍得好辛苦，一個人做兩個角色，換衫拍完呢個又要即刻換衫演第二個，拍成晚通宵都係自己同自己講嘢，好在部劇出街之後都有啲反應，收視都算唔錯。」
嘆來得太遲
無綫開台41年，台慶頒獎禮連今年在內才得12年歷史，問可覺得這個電視頒獎禮來得太遲時，祥仔認同說：「絕對係，好似唱片同電影業，已經一早有諗呢樣嘢（指頒獎禮）。其實呢樣係宣傳活動嚟之嘛！如果喺五虎年代（梁朝偉、劉德華、苗僑偉、湯鎮業和黃日華）開始搞，真係幾熱鬧㗎！當年無綫因為冇乜電視小生，來來去去都係鄭少秋、周潤發，所以先至捧五虎出嚟，如果TVB當時太早搞頒獎禮，就年年都係鄭少秋、周潤發攞，所以五虎嗰陣時就應該搞，咁先至百花齊放，五虎之後仲有吳鎮宇、劉青雲同周星馳，如果一路keep到𠵱家，電視工業可能更加蓬勃，電視頒獎禮個根基打得更好。」
最佳男配角提名名單
黎耀祥：《秀才愛上兵》（戴從文、戴從武）
徐榮：《同事三分親》（裘俊）
歐錦棠：《同事三分親》（武紀勇）
秦沛：《和味濃情》（高守）
馬國明：《太極》（米豐年）
李思捷：《原來愛上賊》（譚彬）
周驄：《溏心風暴之家好月圓》（鍾泛達）
梁烈唯：《尖子攻略》（陳力奔）
羅仲謙：《尖子攻略》（樊沛冬）
郭政鴻：《野蠻奶奶大戰戈師奶》（王仲祥）
資料來源：無綫電視
