美國選出新總統，全球即刻充滿新希望，旨望呢位創造歷史嘅黑人總統打救世界，點知香港都有人抽佢水。自由黨噚日又拉隊請願，抗議政府假諮詢，想將部份清水灣郊野公園土地擴建做堆填區。
自由黨急於轉型，近日頻頻示威請願，噚日有幾個區議員上陣，田二少都有露面，最得意係有個着白恤衫打呔嘅疑似奧巴馬隨行，區議員方國珊話特別搵咗個菲籍朋友出嚟示威，象徵任何膚色人種都反對港府做法。有人同八方講，呢個「朋友」平時有幫自由黨人揸車，噚日純粹客串性質。
正所謂做戲做全套，自由黨成班人又舉住多個藍地白字紙牌，將人哋口號「CHANGE」改做「CHANCE」，話呢個係最後機會反對堆填區擴建，都算似模似樣。