呢個禮拜Game界充滿火藥味，XB360同PS3獨佔FPS大作同場互撼，號稱鍊盡XB360功能嘅《GearsofWar2》率先上場，網上對戰殺到天昏地暗，另一邊PS3《全面對抗2》都唔弱，以摩天大廈咁高嘅怪物做賣點，加埋滿天巨型要塞喺頭頂度飛，真係好鬼《天煞》Feel！
文：之達
小小機槍打巨怪
《全2》講外星生物想喺地球插旗，打淨美國頑抗，上集大難不死嘅主角被班師回朝，力抗呢班超樣衰卡米拉。家陣FPS類已達氾濫地步，SCE唔加啲新嘢好難突圍；今集SCE索性玩大佢，加入超巨型怪物對付玩家，第一關嘅四腳機械人得幾層樓高，已經好濕碎，去到第二關金門橋，滿天巨型要塞大舉入侵，敵方淨係氣勢已震撼玩家，估唔到中期仲有摩天大廈咁高嘅怪物出場，地球軍恍如螻蟻，攞住支機關槍邊有得打呀？好彩巨型怪物都有不同弱點，好似四腳機械人就打背部引擎，大口魚就專射佢個口等，不過全都皮堅肉厚，玩家一定要識走位，慢慢打，貪心死衝只會更快GameOver。
60人連線群毆
FPS點可能無Online對戰？《MetalGearOnline》8VS8我已經玩到手忙腳亂，《全2》仲勁，突破性地30VS30，一個地圖60人群戰，子彈橫飛殺聲震天！嫌60人PK太混亂，大可試吓今集8人合作過關模式，裏面一樣有獨立劇情及任務，仲可以揀扮演隊伍中嘅職業，如打頭陣嘅突擊兵、兼顧中後排嘅醫療兵、打長距離嘅狙擊兵等，每個職業升Lv都有特殊技能，包括隱形、補給、防護盾，根本等於引入《FFXI》般嘅MMORPG系統，玩法又幾新鮮喎！美版早一個禮拜已派貨兼開埋Server，最可惜到截稿前一刻，亞、日版仲未能連線，呢兩日惟有煲住單機劇情先喇。
A.合成獸卡米拉眼界好渣，但會成群湧出嚟。
B.玩家只可帶兩把武器，但每把神兵都有副功能包括護盾、散彈等。
C.敵方要塞飛過金門橋，幾乎以為睇緊《天煞》。
敢死隊卡米拉會暴走，
D.當打緊《HouseofDead》密集攻擊就得。
E.8人合作過關要識得分工，唔同職業要緊守自己專長嚟發揮。
遊戲：Resistance2
類型：第一身射擊 機種：PS3
遊戲人數：1-2人（連線60人）
開發商：SCE/Insomniac
行貨售價：$408
