大陸毒奶事件，搞到內地奶製品一哥蒙牛（2319）焦頭爛額，聲名盡喪，創辦人牛根生一封「萬言書」，揭發外資對蒙牛虎視眈眈，為免民族品牌落入老外手上，牛根生聲淚俱下向內地老總求救。噚日《第一財經日報》報道，蒙牛行政副總裁姚海濤話，為應付呢次毒奶危機，蒙牛高層已經集體減薪30至35%。
蒙牛高層減薪三成
唔單止高層減薪共度時艱，連牛根生亦要擱置退休計劃。牛根生原本計劃今年50歲時，退出蒙牛管理層，全身投入自己一手創立嘅「老牛基金會」，為社會公益慈善出力，但家吓爆出單毒奶事件，連累蒙牛股價今年勁挫七成七，試問牛根生點可以喺呢個時候抽身而去？公司表明希望佢繼續留低，牛根生亦已答應，幫助蒙牛走出谷底。
姚海濤仲話，到目前為止，蒙牛仲未有裁員，家吓公司營業額大約回復到毒奶事件前50至60%水平，但蒙牛仲未度過危險期，希望盡快恢復消費者信心咁話。