台慶頒獎禮最佳女配角黑馬人選李香琴，闊別18年回巢無綫，即被安排接演《溏心風暴之家好月圓》，角色恃老賣老但十分愛錫一班孫仔孫女，她說：「呢個角色本身心地好好，不過性格上有少少搖風擺柳。𠵱家出親街好少人叫我琴姐，反而叫我嫲嫲多。」
今年停產
問到琴姐可有信心奪獎時，她說：「我根本就冇諗過，獎項呢啲留番後生喇，有梗係好，但唔會好恨攞。令我最開心係有份抽台慶大獎，全台藝員只有41個名額，我希望可以抽到現金大獎，咁就一定好開心。」琴姐更謂今年會停產，她說：「今年唔拍住喇，我又要做舞台劇。」
琴姐本準備了兩套晚裝出席台慶，但近日竟收到無綫通知連《翡翠歌星賀台慶》也要出席，與關淑怡合唱《三千年後》，令她為服裝問題十分苦惱，她更說：「我怕到時我會唔記得獨白，我又唔知關淑怡唱到邊句之後到我講，嗰時關淑怡演唱會叫我做嘉賓我都唔敢，真係好有壓力。」
現年70多歲的琴姐行動自如兼保養得宜，她自言甚少美容，除戒食牛肉外，未有特別戒口，只是保持工作令身心開朗。採訪：王崇穎
攝影：陳慧安