森多利亞前鋒卡斯辛奴行為古怪，神神化化；我求大俠前晚睇意大利盃，見到身為隊長嘅佢響後備席就打喊路，下半場入替又同隊友搶射12碼，最後森多利亞2:1擊敗安玻里晉級8強。
我求大俠唔係要講場波，而係踢爆佢點解咁眼瞓！呢位26歲反叛青年，本月19日將推出個人自傳《ViDicoTutto》（爆晒過你知）。呢位場上鍾意除衫除褲嘅前鋒，坦蕩蕩承認：「我以前褲穿窿，不過我唔做嘢，因為我咩都唔識做，好彩識踢波啫。」晒命咩？招積得你呀！
自傳爆同700女人鬼混
衰啲都仲有呀！佢話自己同過600至700名女性搞搞震，其中20個模特兒。我求大俠諗過以佢副尊容，就算16歲開始有女仔冧佢，都要5.1日搞1個，誇啲啫！不過自傳唔誇邊有人買呢？跟住我又諗，如果意大利女仔平均1.7米高，呢700人瞓喺彌敦道，應該可以由梳士巴利道排到信和門口，壯觀！
手臂紋上中文名「安東尼奧」嘅卡斯辛奴，應該對中國傳統文化有啲研究。因為佢話性同食物係人生最完美結合，唔知係咪受中國思想家告子提出嘅「食色性也」啓發呢？照咁睇，卡斯辛奴唔似係老粗。不過，佢仲話比賽日照搞到天光，仲引當年助羅馬4:0大勝祖記為例子，體力真驚人！
踢皇馬期間最放肆
效力皇馬期間係卡斯辛奴最如魚得水嘅日子，「職球員住一樓，只要行上行落一層，就做咩都冇人知。有個侍仔同我好熟，事後會送Cornetti麵包上房畀我食。」前皇馬教練卡比路睇完本自傳，應該會向卡斯辛奴計劃之周詳，甘拜下風啦！