近日OL界最hit的八卦話題，是城中闊佬那位「身痕」女伴價值不菲的H字頭手袋。據雜誌爆料，估計平均要四十萬一個，她擁有五十個，單是袋袋，已經平安了二千萬。
五十個手袋是一間中半山所謂豪宅的價錢，在豪門眼中，不算多。但豪宅不可能配衣服四圍走，手袋天天晒冷出台，唔慌冇人知。OL袋迷心竅紛紛認為，肯豪買手袋給女伴的男人，衰極有譜。手袋是女人的精銳裝備，官場也曾閃耀過手袋黨，女高官的那些名牌袋袋，遠遠沒五十個那麼多吧。闊佬擲錢給你買袋，有袋揸手，比什麼都安全。女人拿着闊佬標記到處招搖，目的不外一個，撻袋代替撻朵。其他女人袋都冇個，點埋到身？
可是，到闊佬身邊的助理也開始有袋用，女人知女人事，牙刷可以共用，手袋絕對不能share。撞袋更加無法忍受。可以想像假如這兩個女人開片，九成會用手袋做武器。馬來西亞試過有倒楣男人遭女賊用手袋扑到重傷，負心漢要小心了。被一隻H袋扑還受得了，五十隻一齊扑，就會成為開埠以來第一個遭手袋襲擊瓜柴的苦主。不過，邊有女人捨得用H袋扑衰公，係都剝成隻熨斗的LV（一對賣八千八）厚底高跟鞋鋤佢弟弟！