喺《畢打自己人》做秘書嘅江欣燕，斯斯文文以為幾好蝦，實則外柔內辣，咁梗係借架辣車俾佢發揮吓。「日產GTR？乜玩到咁勁呀？」最衰鬍鬚同事嚇多佢一嚇：「有個Sales都炒咗部。」搞到佢耍手擰頭。最後咪又係踩得心花怒放，唔理係秘書定女車手，上得戰神，就同喺寫字樓一樣，唔得罪得呀！
撰文：嘴嚼爺
攝影：伍慶泉
輕輕試
雖然明顯試得唔夠盡情，由開頭驚到後尾專心開快啲，都感受到GT-R魅力所在。
烈火Daddy無遺傳
先嚟江欣燕駕車成長歷程。
十幾年牌，江欣燕話未揸過跑車。咁細個都有俾跑車男追過啩？飛仔接放學都有啩？點知飛仔就無，Daddy就有一個，「我記得12、3歲，有次我Daddy嚟接我放學，揸咗架Yamaha電單車嚟，一見到我就拋個頭盔過嚟，『欣欣！上車！』好型呀呵！嚇死我呀！」
到自己考牌，先知自己鍾意車，「報完自動波牌先知自己鍾意。學車學親都兩個三個鐘，最後學咗六十幾個鐘先去考，一次Pass啦！」第一架車寶馬325，之後都係房車，「屋企人唔俾我揸跑車，所以無俾人扣過分，個牌仲新簇簇。」嗰個屋企人肯定唔係烈火Daddy，「我曾經請過司機，但係坐得多後座又掛住揸車感覺，於是成日坐前座，好似跟車女郎咁，哈哈！所以司機退休後我就自己揸番喇，最鍾意夜晚揸車，感覺好自由。換咗呢架（寶馬X5）兩年左右，大車安全啲啦，Jeep車身又高，我本身個人細粒，高啲睇得清楚啲……同埋型啲囉！」
寶寶道行高
唔係江欣燕叫寶寶，係佢唔小心漏咗口風出賣咗自己，「呢架寶寶我都幾鍾意……呀，我幫佢改咗個名叫寶寶，好低能呀呵？」唔低能，仲好可愛㖭。
鍾意揸車鍾意到幫架車改名叫寶寶，梗係要試揸跑車啦，呢架擁有V6雙Turbo嘅戰神，480hp馬力，我叫佢Gigi，驚未？「驚呀真係，我係咁意揸吓作狀算喇。」上到車，本來慢慢揸，咦？越嚟越靜越嚟越靜，我係唔係已經去咗第二個世界？但係我未見到一條有白光嘅隧道喎！啋！原來江欣燕越揸越專心，開始快快踩深啲，不過每到關鍵時刻都好安全咁慢番落嚟，「架車好辣呀呵？不過我覺得揸車好講忍唔忍到手，你試吓跟住一架車一陣，你會睇到佢嘅性格，就知道個司機道行高唔高。」我一定係成龍大哥口中心浮氣躁嗰隻，「其實我係唔敢揸得太快，我唔想戴頸箍開工呀！哈哈！」
同地盤工友特別有緣
跟人尾真係可以睇到佢性格？我咬牙切齒講緊環保大道，泥頭車平排變身嘆息之牆阻住晒，我睇到佢佢睇唔到我時，佢竟然話：「唔係吖，其實佢哋都好好人，成日打燈讓我㗎！」原來欣欣同地盤工人零舍有緣，講起揸車難忘經歷，「試過有次唔夠瞓出外景，咁未輪到我，我就喺車度瞌陣啦，一起身，見到好多好黑嘅猛男黐住塊玻璃，嘩！嚇死！開窗原來佢哋係地盤工人放三點三，佢哋以為我暈咗呀！」
即係咁，我估唔到欣欣對啲工友們有咁好印象，嗱，如果各位工友睇到呢篇報道，下次喺環保大道遇到秘書欣欣不妨大膽啲同佢Say個Hi！不過，唔該靠左先。
NissanGT-R規格
引擎：3,799c.c.DOHCV6Twin-turbocharged
馬力：480hp/6,400rpm
扭力：60kgm/3,200-5,200rpm
傳動：6前速半自動波箱
售價：$869,000起
查詢：富利堡（23330747）
