花旗國會先排好緊張咁爭論救市方案，最後要保爾森跪求國會議長佩洛茜先至傾得掂，批咗7000億美元救市，主要係向銀行收購問題資產，點知保爾森前晚走出嚟話發現呢個唔係最有效嘅方法，一於要改，結果花旗股市大插，港股仲慘，噚日大跌717點，13000關都危危乎。
𠵱家大家應該知道花旗嘅政策風險仲大過我哋祖國，政策改變得咁突然，背後嘅原因肯定唔慌好，港股噚日靠A股撐實個場，睇嚟4萬億元救市方案嘅力量仲會發揮。
中鐵建C輪14919：中鐵建（1186）噚日逆市升2.1巴仙，收10.14元，調整咗兩日再炒上，呢隻救市方案受惠股可以睇好，上望12.50元，可以諗吓隻C輪14919，昨收24.9仙，有效槓桿2.4倍，正股升上12.50元，14919可見40仙，正股跌穿9.20元，就沽咗隻輪。
俊樺