曾幾何時，SubaruImpreza代表野性難馴，誇張霸道嘅外形，散發住少年輕狂。然後，係一次驚變，Impreza順應時勢，放棄一身硬朗稜角，竟然追求流麗線條，操控亦走向大眾化。你說它不再有性格？但卻係大受歡迎，今年更加乘勝追擊，逆市強推Impreza2.0R，除大熱揭背，亦有四門房跑。如果依然懷念Impreza嘅「辣味」，四門版，會多番幾分。
記者：黎頌詩
攝影：陳盛臣
Model：Vanessa（StageModel）
尾喉最辣
雖然有人認為，大變臉後嘅Impreza，失卻了獨有嘅個性，但無疑，新一代嘅Impreza身上，有齊大眾化市場嘅人氣元素。首先，樣靚！全車幾乎找不到一絲稜角，一身線條柔和流麗，驟眼看來，與任何一部充斥街頭巷尾嘅日本房車無異。當然，喺設計上Impreza依然有其獨特性，車頭造型相當奪目，鬼面罩和頭燈巧妙地連成一線，上端跟頭冚曲線配合，而下方卻成波浪形，生動之餘，又添幾分厚重感。身為爛劈王Impreza嘅後代，即使換個斯文Look，傳統嘅運動氣息仍然叫人期待，新嘅Impreza2.0R算是畀多少少。車身裙腳，尾冚上亦裝上巨型、但又不誇張嘅定風翼。雖然，揭背版車尾有大大塊擾流，不過論惡相跑格，始終四門版單靠車尾就贏晒。因為四門版尾燈線條竟然極為方正，與揭背版嘅圓潤明顯不同，最強嘅都係車底嗰兩條雙出燕子尾喉，辣格即時回歸！
享受為先
內櫳走舒適高雅路線，跑味只靠一對跑車桶椅獨撐。而各處嘅銀色電鍍飾面令車廂多了貴氣，真皮軚環有埋操控按鈕，加上車長增加165毫米，更具空間感，明顯享受為先。本來已大膽變揭背，今次又回頭玩四門三廂，當你以為佢向死硬派屈服，卻原來路線堅定。尾排椅背為活動式，一拉低，尾廂容量大大提升。看來Impreza攻佔日用車市場立場不變。血脈相承，始終不變的是Subaru獨家左右平衡式恆時四驅系統，由2.0公升引擎驅動。操控性係佢傳統強項，雖只四前速，但起步加速靈活。我揀車以好用樣靚為上，Impreza2.0R性能不俗，不過迷戀Impreza嘅友人話：「唔夠勁。」大概要Turbo版登場才能叫死硬Fans們折服。
規格
引擎：1,994c.c.
馬力：150ps/6,400rpm
扭力：20.0kgfm/3,200rpm
傳動：直控式電子4前速自動、SPORTSHIFT+/-波
售價：$188,000 查詢：意美汽車（25112727）