謝婷婷前晚在中環出席活動時，自爆早前在上海工作，巧遇偶像、著名網球手費達拿兼影合照，開心得連續5小時不想講話。入行數月即遇上金融風暴，她謂略受影響，如工作量略減，延遲出糧等。
金融海嘯，市況欠佳，投身模特兒界後工作頻頻的謝婷婷，前晚穿上VanessaBruno黑裙出席瑞士腕錶Parmigiani在中環舉行的酒會，她謂近期工作及活動也略略減少，她說：「出糧都慢咗啲，不過都OK，夠生活囉。」婷婷謂入行成績也獲母親讚揚，她說：「媽咪話我都有禮貌、準時，但佢話我要笑多啲。」
影合照開心陶醉
婷婷透露剛在上海出席網球活動，更遇上偶像、瑞士網球手費達拿，她說：「因為我都打tennis，好開心見到佢，冇打波，但有同佢影相合照，嗰晚見咗佢之後，我成五個鐘頭都冇講嘢，因為太開心，唔識得講嘢。」
問婷婷有否儲腕錶？她說：「我鍾意錶但唔會儲，收嘅第一隻錶係Bvlgari，都有男仔送過錶，不過係聖誕禮物，冇特別意思。自己最深刻嘅禮物，反而係以前喺加拿大搵錢，同兩個女仔朋友喺Tiffany買咗三條鏈，三個女仔一齊戴。」
姚書軼再寸黛林
此外，「地王嫂」姚書軼（Mikki）穿上性感Valentino裙，與男友曾智超一同出席。提到「天王嫂」熊黛林遭城城fans圍攻，Mikki繼續半講笑地暗寸熊黛林說：「冇睇，不過冇乜必要都唔好得罪fans，好彩我男友係冇fans啫，佢老少咸宜，男女都啱，啲朋友都成日同我講，話佢好正。」曾智超則自爆曾遭阿伯掃手背，及在健身室被男士狂昅。
採訪：LawWaiMan
攝影：WongManWai